Ақтау жаңа жылдық безендіруге 13 млн теңге жұмсамақ

АҚТАУ. ҚазАқпарат ­­- Ақтауды Жаңа жылдық безендіруге 13 млн теңгеден астам қаржы бөлу жоспарлануда. Бұл тураалы Лада.кз Ақтау тұрғын үй-коммуналдық шаруашылық бөлімінің басшысы Берік Ізғалиевке сілтеме жасап хабарлады.

Мердігер компанияны анықтау үшін конкурс жарияланды.  Конкурсқа  2017 жылғы 19 қарашаға дейін өтініштер қабылданады.

Берік Ізғалиевтің айтуынша, жаңа жылдық безендіруге ақтаулықтар Тәуелсіздік күнінен кейін кіріседі. Конкурс жеңімпазы желтоқсанның басында анықталады.

Осы мақсатта бюджеттен 13 миллион 901 мың 785 теңге қарастырылып отыр. Техникалық сипаттамаға сәйкес, мердігер компания 20 желтоқсанда іске кірісіп, үш күн ішінде «Ынтымақ» және «Астана» алаңдарын, сондай-ақ облыстық әкімдік пен «Қазақтелеком» ғимаратының алдындағы алаңды безендіруі тиіс.

12 метрлік екі шырша «Ынтымақ» және «Астана» алаңдарына қойылады. «Ынтымақ» алаңындағы 714 метрге созылып жатқан бұталар, 100 боз арша және 326 түп ағаш  жарық диодты гирляндалармен көмкеріледі. Облыстық әкімдік пен «Қазақтелекомның» маңындағы және «Астана» алаңындағы бұталар мен ағаштар да гирляндалармен, кестелермен, жылтырауық шамдармен безендіріледі. «Астана» алаңындағы «Каравелла» монументі 738 жарық диодты гирляндамен әшекейленеді, сондай-ақ «Ақбота» паркін де жарық диодты шамдармен безендіру жоспарланып отыр.