Ақсай қаласында 55 жастағы ер адамды өлтірген күдікті ұсталды
БҚО полиция департаментінен түскен мәліметке қарағанда, Ақсайда 5-шағынауданда зорлықпен өлтірілген 1966 жылғы ер адамның мүрдесі табылды.
Департамент бастығы, полиция генерал-майоры Махсұдхан Аблазимовтың айтуынша, жедел іздестіру іс-шаралары барысында 1992 жылғы күдікті қолға түсті.
Куәлардың сөзіне қарағанда, екі ер адам үй ауласында бірге арақ ішкен. Сосын адам аяқ баса қоймайтын жерге барып, бір-бірімен сөзге келген.
Тергеу барысында анықталғанындай, керіс соңы төбелеске ұласып, күдікті жәбірленушінің басынан бірнеше рет ұрып, кетіп қалған. Содан кейін танысының үйіне барған кезде тәртіп сақшыларымен ұсталған.
Қазіргі кезде уақытша ұстау изоляторына қамалған күдіктіге қатысты ҚР ҚК 99-бабы 1-бөлігіне (кісі өлтіру) сәйкес сотқа дейінгі тергеу амалдары жүргізілуде.
Еске сала кетейік, бұдан бұрын БҚО-да жүк көлігі аударылып қалғанын жазған болатынбыз.
