Ақмолалық ардагер самбодан Қазақстан чемпионы атанды
Ақмола облыстық дене шынықтыру және спорт басқармасы баспасөз қызметінің мәліметінше, Түркістан қаласында ардагерлер арасында самбодан Қазақстан чемпионаты өтті. Жарысқа еліміздің әр өңірінен 200-ден астам спортшы қатысып, шеберлігін ортаға салды. Олардың арасында Ақмола облысынан барған самбошылар бір алтын және үш күміс медаль иеленді.
«Чемпионатта 55-59 жастағылар арасында 90 келі салмақта сынға түскен атбасарлық Болатбек Қожаев қарсыластарын тізе бүктіріп, алтын медаль иеленді. Сондай - ақ, 35-39 жастағылар арасында (100 келіден жоғары салмақта) бұландылық Көпжасар Князов, 50-54 жастағылар арасында (74 келі салмақта) қорғалжындық Мұрат Түсіпбеков, 65 және одан жоғары жастағылар арасында степногорлық Смағұл Ахметжанов күміс жүлдегер атанды», - дейді ведомствоның баспасөз хатшысы Махаббат Большина.