Ақмолада жол апатына ұшыраған көлікте қалып қойған адам құтқарылды

КӨКШЕТАУ. ҚазАқпарат - Ақмола облысының Астрахан ауданында жол апатына ұшырап, зардап шеккен адам құтқарылды, деп хабарлайды ҚазАқпарат тілшісі.

Облыстық төтенше жағдайлар департаменті басқармасы баспасөз қызметінің мәліметінше, желтоқсанның 23-де «Екатеринбор-Алматы» тасжолының 1140-шы шақырымында 2 жүк көлігі соқтығысқан.

«Оқиға орнына дереу Астрахан ауылындағы №19 өрт сөндіру бөлімінің қызметкерлері мен техникасы, Астрахан аудандық төтенше жағдайлар басқармасының жедел тобы жетті. Жол-көлік оқиғасы салдарынан мыжылған автокөлік кабинасынан бір адамды алып шығу қажет болды», - деді ведомстводан.

Құтқарушылардың жедел іс-қимылының арқасында зардап шеккен адам көліктің ішінен шығарылып, жедел-жәрдем бригадасына тапсырылды.