Ақмолада өртенген үйден 37 жастағы ер адамның денесі табылды

КӨКШЕТАУ. ҚазАқпарат - Ақмола облысының Зеренді ауылында жеке тұрғын үй өртенді. Өртті сөндіру кезінде 37 жастағы ер адамның денесі табылды, деп хабарлайды ҚазАқпарат тілшісі облыстық Төтенше жағдайлар департаменті баспасөз қызметіне сілтеме жасап.

«Сәуірдің 30-да Зеренді ауылындағы жеке тұрғын үйден өрт шықты. Өрт болған үйден 37 жастағы ер адамның денесі табылды. Алдын ала мәлімет бойынша ер адам иіс тиіп, көз жұмған. Сонымен бірге, денесін орташа күйік шалған 1961 жылғы ер адам ауруханаға жеткізілді. Дәрігерлер оның жағдай тұрақты деп отыр», - деді ведомстводан.

Тілсіз жауды сөндіруге Төтенше жағдайлар департаментінің жеке құрамынан 8 адам және 2 өрт сөндіру техникасы жұмылдырылды. Өрт аумағы 115 шаршы метрді құрады.

«Қазіргі кезде, өрттің шығу себебі анықталып жатыр. Оқиға орнында зерттеу өрт зертханасы мен аудандық полиция бөлімінің жедел тергеу тобы жұмыс істеуде», - деп толықтырды ведомстводан.

Айта кетсек, Ақмола облысында қаржы пирамидасын құрған әйелдің ісі сотқа жолданды.