12:00, 18 Қазан 2020 | GMT +6
Ақмолада кен орнында 33 жастағы жұмысшы топырақ астында қалып, мерт болды
КӨКШЕТАУ. ҚазАқпарат - «Қазақалтын» кенішінде 33 жастағы жұмысшы топырақ астында қалып, мерт болды, деп хабарлайды ҚазАқпарат тілшісі облыстық төтенше жағдайлар департаментінің баспасөз қызметіне сілтеме жасап.
Ведомствоның мәліметінше, оқыс оқиға «Қазақалтын» тау-кен металлургия комбинаты» АҚ Бестөбедегі кенішіндегі жаңа шахтада болған.
Қазанның 17-де өндірістік жұмыстар кезінде топырақ опырылып кетті. Салдарынан кәсіпорынның 1987 жылғы жұмысшысы топырақтың астында қалып қойған.
«Оқиға сағат 12:30 орын алды. Сол кезде «Қазақалтын» тау-кен металлургия комбинаты» АҚ құтқару отряды ер адамды топырақ үйіндісінің астынан алып шықты. Алайда, ол Степногор қалалық ауруханасында көз жұмды», - дейді Степногор қалалық ТЖ басқармасының бастығы Еркебұлан Есенжолов.
Қазіргі кезде кеніш штаттық режимде жұмыс істеп тұр. Төтенше жағдайдың себебі анықталып жатыр.