Ақмола облысының екі тұрғыны мал ұрлағаны үшін 8 және 5 жылға сотталды
СҚО полиция департаменті баспасөз қызметінің мәліметінше, Ақмола облысының екі тұрғыны 2021 жылдың жазында мал ұрлаумен айналысқан. Олар өз өңірлерінде ғана емес, көрші СҚО-ға да келіп, жұрттың қорасын бұзып кіріп, малдарын артып әкетіп отырған.
Тайынша ауданы тергеушілерінің айтуынша, қылмыскерлердің біреуі - бұрын сотталған Көкшетау аласының 39 жастағы тұрғыны. Оның 4 қылмысқа қатысы бары анықталды. Щучинск қаласында тұратын оның 45 жастағы сыбайласы да бұрын істі болған, ол 3 қылмыс бойынша күдікке ілінді. Ұрылар қой мен бұзауларды көкшетаулықтың «Nissan Primera» автокөлігімен әкеткен.
«Көкшетау тұрғыны 8 жылға бас бостандығынан айырылды, Щучинск қаласының тұрғыны 5 жылға сотталды. Ұрлықтар қора-қопсыға бұзып кіру арқылы да, малды байланып тұрған жерінен әкету арқылы да жасалған. Десек те, мал ұрлығы көп жағдайда малдың еркін жайылымда жүруінен болады. Полиция қызметкерлері халықпен кездесу кезінде, БАҚ және әлеуметтік желі арқылы мал иелерін өз мүліктеріне сақ болуға, бақташы мен жергілікті атқарушы органдармен үш жақты келісім жасауға шақырады», - дейді СҚО полиция департаменті криминалдық полиция басқармасының бастығы Марат Жұмалиев.
Тәртіп сақшыларының айтуынша, СҚО-да мал ұрлығы айтарлықтай төмендеген. 8 айдың ішінде осындай 11 қылмыс тіркелді, өткен жылдың ұқсас кезеңімен салыстырғанда бұл 12 қылмысқа аз, яғни 52,2 % төмендеген. Бұл полицейлердің профилактикалық жұмысы, малды еркін жаюға заңнамамен тыйым салу және 2019 жылдың соңында ҚР Қылмыстық кодексінен бөлек «Мал ұрлығы» 188-1-бөлігінің енгізілуі арқасында болып отыр. Полицейлердің айтуынша, барымташыларға 10 жылға дейін бас бостандығынан айыру жазасы қарастырылған.