Ақмола облысындағы цемент зауытында жұмысшы мерт болды

КӨКШЕТАУ. ҚазАқпарат - Ақмола облысында цемент зауытында жұмысшының өліміне байланысты тергеу амалдары жүргізілуде, деп хабарлайды ҚазАқпарат тілшісі облыстық ПД баспасөз қызметіне сілтеме жасап.

Ведомствоның дерегі бойынша, қаңтардың 27-де Біржан сал аудандық полициясының кезекшілік бөліміне аудандық аурухананың медбикесінен медициналық мекемеге жеткізілген ер адамның көз жұмғаны туралы хабар түсті.

«Тексеріс кезінде мерт болған 24 жастағы жігіттің «Көкше цемент» ЖШС цех шебері болып жұмыс істегені анықталды. Ер адам жұмыс орнында вагонды сүйреу кезінде трос үзіліп кетіп, қарын тұсына тиген.

Қазіргі кезде осы оқиға байланысты ҚР ҚК 156 бабының 3 бөлігі бойынша (Еңбекті қорғау ережесінің бұзылуы) сотқа дейінгі тергеу амалдары жүргізілуде. Сот-медициналық сараптама тағайындалды»,- деді ведомстводан.