Ақмола облысында соңғы бес жылда төрт балалар үйі жабылды

None
None
НҰР-СҰЛТАН. ҚазАқпарат - Ақмола облысында соңғы бес жылда төрт балалар үйі жабылды. Өйткені сәбиді жетімдер үйінің босағасында телміртпей, қамқорлыққа алатындар көбейген, деп жазады «Хабар 24».

Қазір бұл аймақта ата-анасыз қалған 1500-ден астам жеткіншектің 88% мейірімді жандардың қолында. Дегенмен, бұл, жетімдер мәселесі шешілді дегенді білдірмейді. Үлкен өмірге қадам басқан жастардың алдынан талай қиындық шығады.

Өңірде бірнеше балалар үйі қысқарғанымен, аймақта тағы осындай 4 мекеме қалып отыр. Оларда ата-анасының қамқорлығынсыз қалған 200-ге жуық бала тәрбиеленуде. Облыс орталығында өткен жиында сала мамандары мен әлеуметтік мекемелердің басшылары жастайынан жетім өсіп келе жатқан жандарды қоғамға бейімдеу мәселесін талқылады. Бірі: «Оларды спорт пен білімге құштар етіп өсіру керек», – десе, енді бірі: «Қолөнер мен еңбекке баулу қажет», – дейді.

«Бізде балалар ағаш өңдеу ісін, пішу және тігін өнерін меңгеріп жатыр. Сондай-ақ мекемеде әлеуметтік-тұрмыстық бағыттау кабинеті бар. Онда тәрбиеленушілер қарапайым өмірде қажетті дүниелерді үйренеді. Бізден шығып, колледж оқып, өзімізге қайта келген балалар да бар. Қазір сондай 3 түлегіміз қатарымызда қызмет етіп жүр», - дейді Урюпинка ауылындағы мектеп-интернат арнайы кешенінің директоры Юлия Алдажарова.

Балалар үйінің тәрбиеленушілері тамақтан және басқа да қажеттіліктерден кем боп жатқан жоқ. «Басты мәселе – олардың ертең ортаға сіңісіп кетуіне барынша жағдай жасау», – дейді мамандар. Яғни өз күнін өзі көре алатындай дәрежеге жеткізу. Ал ол үшін қолда бар мүмкіндіктердің бәрін қолдану қажет. Патриоттық тәрбиені де ұмытпаған жөн.

«Мемлекет тарапынан барлық көмек көрсетіліп жатыр. Ең бастысы, осы балаларға тәрбие мәселесін ерекше назарда ұстау керек. Дұрыс тәрбие беру қажет. Барлығы мемлекеттің қарауындағы мекеме болғаннан кейін мемлекеттік тілде оқыту мәселесін қарастыру басты орында тұр», - дейді облыстық Білім басқармасы басшысының орынбасары Ботагөз Дүйсенова.

Ал балалар үйінен түлеп ұшып, үлкен өмірге қадам басқан жасөспірімдер үшін ең басты проблемалардың бірі – баспаналы болу. Өкінішке қарай, сандар көңіл көншітпейді. Соңғы бес жылдың ішінде небәрі 300 балаға пәтер берілген. Ал кезекте әлі осы санаттағы 4 мыңнан астам адам тұр.

Соңғы жаңалықтар