Ақмола облысында менингитке 544 адам тексерілді
Брифингте Серік Омарханов менингококк инфекциясы бойынша соңғы тіркелген мәліметке байланысты түсініктеме берді.
Оның айтуынша, Бурабай ауданының Щучинск қаласындағы мамандандырылған медициналық мекемесіне 2018 жылдың 1 маусымы күні менингококк инфекциясын жұқтырды деген күдікпен науқас түскен. Науқастың жұтқыншағынан жағынды алынып, «Nisseria meningitides» табылды (сау жұқтырушы). 1 маусымда инфекционист-дәрігер профилактикалық ем тағайындады. Бүгінгі күні науқас изоляторға оқшауланған, санация және антибиотиктермен емдеу жүргізілуде.
Ақмола облысының медициналық ұйымдарының мәліметтері бойынша, 544 адам тексерілді, оның 251-і пациент және 293-і персонал. 298 анализде инфекция табылмаған, 246-сы жұмыс барысында. Зерттеу кезінде барлық 544 адамда клиникалық белгілер анықталмаған.
«Алдын алу мақсатында Щучинск қаласындағы тұрғын үй мекенжайы бойынша 5 адам тексерілді, нәтижелері - теріс. Ал Ақкөл ауданында менингит инфекциясына күдікті тұрғындар жоқ. Сонымен қатар, 5 маусым күні Астана қалалық жұқпалы аурулар ауруханасында жатқан 1994 жылы туған Шортанды ауданының тұрғынында менингококк инфекциясына күдік жойылып, «Энтеровирусты инфекция» диагнозы қойылды. Науқас емделіп жатыр. Қарым-қатынаста болған 7 адаммен профилактикалық жұмыс жүргізілді. Зертханалық зерттеу, оториноларинголог дәрігердің тексеруі, менингококк инфекциясының алдын алу шаралары туралы әңгіме өткізілді», - деп түсіндірді Серік Омарханов.
Еске сала кетейік, Ақмола облысы бойынша тәулік бойы 8 (800) 080-64-81 номерімен call-орталық жұмыс істейді. Маусымның 6-7 күндеріндегі жағдай бойынша менингитті алдын алу, диагностикалау және емдеу мәселелері жөнінде 55 сұрақ келіп түсті. Барлық сұрақтар бойынша тиісті түсініктемелер берілді.