Ақмола облысында мектеп оқушыларына материалдық көмек көрсетіледі
Бұл тізімге әлеуметік жағынан аз қамтылған және көпбалалы отбасылар, атаулы әлеуметтік көмек алатын отбасылардағы 2800 астам оқушы еніп отыр. Ақмола облыстық жұмыспен қамтуды және әлеуметтік бағдарламарды үйлестіру басқармасы басшысының орынбасары Шолпан Рахматуллинаның мәліметінше, ата-аналардың есеп-шотына аудару үшін қаражат аудандық бөлімдерге жіберілді.
«Карантин шаралары енгізілгендіктен тұрғындар өзіне қажетті азық-түлік, тұрмыстық жинақты сатып алуы және өзге де шығындарды өтеуі үшін ақшаны аудару туралы шешім қабылданды», - деп атап өтті Шолпан Рахматуллина.
Айта кетейік, 2020 жылдың 1 қаңтарынан бастап Қазақстанда атаулы әлеуметтік көмек көрсетудің механизмі жетілдірілді.
Мемлекеттік көмектің жаңа әдісі кешенді түрде жүзеге асырылады және оның ішіне: көпбалалы отбасыларға жаңа мемлекеттік жәрдемақы, атаулы әлеуметтік көмек, аз қамтылған отбасылардағы балаларға кепілдендірілген әлеуметтік пакет, оның ішінде 1-6 жастағы балаларға азық-түлік, тұрмыстық химия тауарлары кіреді.