Ақмола облысында қонақүй өртенді

КӨКШЕТАУ. ҚазАқпарат - Ақмола облысының Бурабай ауданында қонақүйден өрт шықты, деп хабарлайды «ҚазАқпарат» ХАА тілшісі аймақтық ТЖД-ның баспасөз қызметіне сілтеме жасап.

ТЖД мәліметі бойынша, өрт 18 маусым күні түнгі 04:58 шамасында Щучинск қаласынан 9 шақырым қашықтықта орналасқан курортты аумақтағы «Алатау» қонақүйінде болды.

«Тілсіз жауды ауыздықтауға аймақтық ТЖД-ның жеке құрамынан 40 адам мен 7 техника жұмылдырылды. Жалын аумағы 400 шаршы метрді құрады. Өрттен ғимараттың қабырғасы бүлінді. Зардап шеккендер жоқ», - деп көрсетілген хабарламада.