Ақмола облысында 58 медициналық нысан мен мектеп салынады

2023 жылғы 28 қаңтар, 20:52
Ақмола облысында 58 медициналық нысан мен мектеп салынады

КӨКШЕТАУ. ҚазАқпарат – Ақмола облысында 58 медициналық нысан мен мектеп салу жоспарланған. Бұл туралы Үкімет басшысының орынбасары Алтай Көлгіновтың өңірге жұмыс сапары барысында айтылды, деп хабарлайды ҚазАқпарат тілшісі.

Вице-премьер «Фостерлік отбасылар», «Ауыл Аманаты», «Ауылдық денсаулық сақтауды жаңғырту», «Жайлы мектеп», дуалды оқыту тәрізді мемлекеттік бағдарламаларды жүзеге асыру барысымен танысты.

Ақкөл ауданындағы балаларды қолдау орталығында елімізде алғаш рет «Фостерлік отбасылар» кәсіби бала асырап алу отбасыларын құру жөніндегі пилоттық жоба іске қосылған.

«Бұл – өте маңызды жоба және оны сапалы іске асыру үшін барлық күш-жігерімізді жұмсауымыз қажет. Біздің міндетіміз – балаларды әлеуметтендіру. Ата-анасының қамқорлығынсыз қалған балалар, отбасында тұрып тәрбиеленуі тиіс. Оқу-ағарту министрлігі тарапынан да, нормативтік базалар бойынша да қолдау көрсетіледі», - деп атап өтті вице-премьер Алтай Көлгінов.

Сондай-ақ, Премьер-Министрдің орынбасары «Ауылдық денсаулық сақтауды жаңғырту» жобасы аясында Ақкөл аудандық ауруханасына барды. Ғимарат күрделі жөндеу мен жаңғыртуды қажет етеді.

Ақмола облысында ұлттық жоба аясында медициналық-санитариялық алғашқы көмек көрсетудің 38 нысаны салынады, бірқатар ауданаралық ауруханада күрделі жөндеу мен жаңғырту жұмыстары жүргізіледі. Сонымен қатар, медициналық көмекке қолжетімділікті арттыру мақсатында Көкшетау қаласында 630 орынға арналған көпбейінді облыстық аурухана салынады.

Жалпы, 2023-2025 жылдары ел өңірлерінде және шалғай ауылдарда медициналық-санитариялық алғашқы көмек көрсетудің 650 нысаны салынады. Биыл 300-ден астам нысанның құрылысы басталады, сондай-ақ 30-дан астам орталық аудандық ауруханада күрделі жөндеу және реконструкциялау жұмыстары жүргізіледі. Бұл шаралар «алтын сағат» қағидаты бойынша жергілікті жерлерде медициналық көмек алуға мүмкіндік береді.

Көкшетау қаласында Алтай Көлгінов «Eurasia Group Kazakhstan» ЖШС базасында дуалды оқыту бағдарламасын жүзеге асыру барысымен танысты. Агротехникалық колледж студенттері өзара ынтымақтастық жөніндегі меморандум аясында кәсіпорында кәсіби тәжірибеден өтіп, одан әрі жұмысқа орналасады. Ақмола облысы әкімдігінің ақпараты бойынша дуалды оқыту нысаны 28 колледжде қолданылады, аталған технологиямен 4 мыңнан астам студент білім алып жүр.

Сондай-ақ, Алтай Көлгінов сүт өнімдерін шығаратын «Гормолзавод» ЖШС-да болып, жобаның алғашқы қатысушыларымен кездесті. Бағдарлама аясында кәсіпорын шикізатты жобаға қатысушылардан сатып алады.

photoАқмола облысының әкімі Ермек Маржықпаев атап өткендей, 2023 жылы бағдарламаға қатысушыларды несиелеу үшін мемлекет тарапынан Ақмола облысына 1,2 млрд теңге бөлінді, осы қаражат аясында ауылдық елді мекендерде және шағын қалаларда жаңа бизнес-жобаларды ашуға және қолданыстағы жобаларды кеңейтуге шамамен 250 несие беру жоспарланып отыр.

Алтай Көлгінов Мемлекет басшысының тапсырмасы бойынша ауыл тұрғындарының табысын арттыру жөніндегі жоба 2023 жылдан бастап өңірлердің ерекшеліктері мен әлеуметтік-экономикалық дамуын ескере отырып, барша ел төңірегінде кеңейтілетінін атап өтті. Осы мақсатта республикалық бюджеттен 50 млрд теңгеден астам қаржы бөлінді.

Сондай-ақ, облыста «Жайлы мектеп» ұлттық жобасы аясында 2023-2025 жылдары 26 500 оқушыға арналған 20 мектеп салу көзделген.

Сапар барысында Үкімет басшысының орынбасары Солтүстік Қазақстан, Павлодар, Қостанай облыстары әкімдері орынбасарларының, денсаулық сақтау, еңбек және әлеуметтік қорғау, оқу-ағарту, ауыл шаруашылығы, мәдениет және спорт, ұлттық экономика вице-министрлерінің қатысуымен кеңес өткізді. Онда әлеуметтік мемлекеттік бағдарламаларды сапалы жүзеге асыру бойынша бірқатар тапсырмалар берілді.

Фото: Ақмола облысының әкімдігі


Ұқсас жаңалықтар
Серіктестер жаңалықтары

Jańalyqtar