Ақмола облысында 264 оқушы «Алтын белгіге» үміткер
Облыстық білім басқармасы баспасөз қызметінің мәліметінше, биыл өңірде барлығы 4 986 оқушы мектеп бітірсе, олардың 3 649-ы ҰБТ тапсыруға өтініш білдіріп отыр. Ал, 264 оқушы «Алтын белгіден» үміткер. Білім мазмұнын жаңарту аясында және ҰБТ форматын жетілдіру мақсатында қорытынды аттестация процедурасы бітіру емтиханы және ЖОО-на түсу емтихандары болып бөлінді. Мемлекеттік емтихандар Қазақстан Республикасы Білім және ғылым министрлігінің дайындаған материалдарының негізінде өтеді. 11 сынып түлектерінің 100 пайызы мемлекеттік бітіру емтихандарын 29 мамырдан 9 маусым аралығында тапсырады. Ал, 2018 жылы ҰБТ 20 маусым мен 1 шілде аралығында өтеді.
«Облыс бойынша барлығы 11 ҰБТ тапсыру пункті бар. Олардың 3-еуі Астана қаласында орналасқан, онда Қорғалжын, Целиноград, Аршалы аудандарының түлектері тест тапсырады», - деп көрсетілген баспасөз хабарламасында.
Сонымен қатар, облыста жазғы маусым кезінде 17 сауықтыру орталығы қызмет істейтін болады. Жалпы, облыс бойынша 1-10 сыныптарда оқитын барлығы 111 700 оқушы болса, оның 99 пайызын осы орталықтарда демалдыру жоспарлануда.
Оған қоса, балалардың жазғы демалысын өткізу үшін мектеп жанында 600-ден астам лагерь ұйымдастырылады. Сондай-ақ, «Ұлы дала елі» және туристік өлкетану экспедициясы өткізілсе, 10 мың оқушы облыстың киелі жерлеріне саяхат жасайтын болады.