Академик Қалық Абдуллаев өмірден озды
2020 жылғы 13 желтоқсан 18:03

Академик Қалық Абдуллаев өмірден озды

НҰР-СҰЛТАН. ҚазАқпарат - Қазақстанның еңбек сіңірген қоғам және саяси қайраткері, академик Қалық Абдуллаев өмірден озды, деп хабарлайды ҚазАқпарат тілшісі.

Бұл туралы саясаттанушы Ербол Еділов Telegram-каналында жазды.

«1997-1999 жылдар аралығында Оңтүстік Қазақстан облысының әкімі болған Қалық Абдуллаев 78 жасында өмірден озды. Туған-туыстары мен жақындарына қазаға байланысты қайғырып көңіл айтамыз. Иманды болсын!», - деп жазды ол.

Қалық Абдуллаев 1942 жылы 28 маусымда Оңтүстік Қазақстан облысы, Ленгір ауданы, Қасқасу ауылында дүниеге келген. 1963 жылы Ташкент политехникалық институтын инженер-электрик мамандығы бойынша оқыған.

1981 жылы «Құрмет Белгісі» орденімен марапатталған. Қалық Абдуллаев Шымкент қалалық, Оңтүстік Қазақстан облыстық Халық депутаттары кеңесінің, Қазақ КСР Жоғарғы Кеңесінің депутаты болған.

Еңбек жолын «Оңтүстікқазэнергоның» аудандық басқармасындағы инженер қызметінен бастаған.

1969 жылы Республика энергетика министрлігінің аппаратына жаңадан ұйымдастырылған диспетчерлік бірлестік басқармасына энергетикалық тәртіп қызметінің бастығы болып жіберілген. 1974 жылы «Оңтүстікқазэнерго» аймақтық басқармасына бас инженер, кейін басқарма бастығы қызметін атқарған.

1982 жылы Қазақ КСР Энергетика министрінің бірінші орынбасары қызметіне тағайындалды.

1986-1992 жылдар аралығында Қазақ КСР Министрлер Кеңесі төрағасының орынбасары, Республика Мемлекеттік жоспарлау комитетінің төрағасы, Қазақ КСР Министрлер Кеңесі төрағасының бірінші орынбасары, Республика Мемлекеттік жоспарлау комитетінің төрағасы, Премьер-Министрдің орынбасары - Қазақ КСР Мемлекеттік экономикалық комитетінің төрағасы қызметтерін атқарды.

Осы жылдары ол ҚР Премьер-Министрінің орынбасары - Шетелдік инвестициялар жөніндегі ұлттық Агенттік төрағасы лауазымында Қазақстанға шетелдерден инвестициялар тартудың алғашқы тәжірибелерінің негізін қалады.

1992 жылдан 1995 жылға дейін Қазақстандық іскер ынтымақтастық орталығы «Атакент» акционерлік қоғамы басқармасының төрағасы болды. 1995 жылы Қалық Абдуллаевтың іскерлік мол тәжірибесі ескеріліп Республика Президентінің арнайы жарлығымен құрылған ТМД елдерімен ынтымақтастық жөніндегі Мемлекеттік комитеттің төрағасы болып тағайындалды.

1996-1997 жылдары ҚР Президентінің кеңесшісі қызметін атқарды.

1997-1999 жылдары Оңтүстік Қазақстан облысының әкімі, ал 2000 жылдан бері өзі құрған «Атакент» акционерлік қоғамы Директорлар Кеңесінің төрағасы болып еңбек етті.


Ұқсас жаңалықтар
Серіктестер жаңалықтары

Jańalyqtar

Үрдіс

MURAǴAT