Ахмет Байтұрсынұлы мен Мұхтар Әуезов атындағы төсбелгі ғалымдарға жыл сайын беріледі
2022 жылғы 28 маусым 18:53

Ахмет Байтұрсынұлы мен Мұхтар Әуезов атындағы төсбелгі ғалымдарға жыл сайын беріледі

НҰР-СҰЛТАН. ҚазАқпарат - Қазақстан Республикасының Мемлекеттік кеңесшісі Ерлан Қарин ТҮРКСОЙ халықаралық ұйымының бас хатшысы Сұлтан Раевты қабылдады, деп хабарлайды Ақорда.

Кездесуде түркітілдес мемлекеттер арасындағы мәдени-гуманитарлық байланыстарды одан әрі дамыту мәселесі талқыланды.

Ерлан Қарин еліміздің руханият саласында атқарылып жатқан жұмыстар жайында айтты.

Сондай-ақ биыл Ахмет Байтұрсынұлының 150 жылдық және Мұхтар Әуезовтің 125 жылдық мерейтойлары аясында жүзеге асқан іс-шараларға тоқталды.

Мемлекеттік кеңесші айтулы тұлғалардың атаулы даталарын ТҮРКСОЙ шеңберінде өткізудің қажет екенін атап өтті.

Өз кезегінде Сұлтан Раев Ахмет Байтұрсынұлы мен Мұхтар Әуезовтің мерейтойларын халықаралық ұйым аясында атап өтуге қатысты жоспар құрылғанын, сол бойынша тиісті жұмыс жүргізіліп жатқанын жеткізді.

Сонымен қатар тек түркі әлемі шеңберіндегі ғана емес, халықаралық деңгейдегі ғалымдар мен зерттеушілерге жыл сайын берілетін Ахмет Байтұрсынұлы мен Мұхтар Әуезов атындағы төсбелгі шығарылғанын айтты.

Кездесу соңында тараптар жыл соңында Ахмет Байтұрсынұлының 150 жылдығына арналған кең көлемді іс-шара ұйымдастыратын болып уағдаласты.


Серіктестер жаңалықтары

Jańalyqtar

Үрдіс

MURAǴAT