Адалдық алаңы: Шығыс Қазақстан университетінде Абай мұрасы талқыланды
Онлайн конференцияға ҚР Мемлекеттік қызмет істері агенттігінің ШҚО бойынша департаментінің басшысы Жанна Қабдолдақызы, Сыбайлас жемқорлыққа қарсы іс-қимыл департаменті басшысының орынбасары Жігер Байдилдин және ҚР Президентінің жанындағы Мемлекеттік басқару академиясының, С. Аманжолов атындағы ШҚМУ, Қазақстан-Америка еркін университетінің өкілдері қатысты.
Президент Қасым-Жомарт Тоқаев «Абай және ХХІ ғасырдағы Қазақстан» атты мақаласында Абайдың «бір ғасырдан астам уақыт бұрын ұлтты жаңғыруға, жаңаруға, жаңа өмірге бейім болуға шақырған» деп атап өтті. Ендеше, біз осы жаһандану заманында жаманнан жиреніп, жақсыны үйренуіміз қажет.
Университет проректоры Сауле Рахметуллина академиялық адалықты сақтау қағидаларына және Абайдың ұлттық заң жүйесіне қосқан үлесіне тоқталды. Ал Мемлекеттік қызмет істері агенттігінің облыстық департамен басшысы Жанна Қабдолдақызы Абай ілімі негізінде студенттерді адалдыққа тәрбиелеуде оқу орнының рөлі ерекше болатынына тоқталды. Бұдан бөлек, онлайн конференция спикері ШҚО Сыбайлас жемқорлыққа қарсы іс-қимыл департаменті басшысының орынбасары Жігер Байдилдин сыбайлас жемқорлыққа қарсы міндеттерді айқындаған заңнама тарихына тоқталып өтті. Ол өз сөзінде оқу орындарында сыбайлас жемқорлық құқық бұзушылықтар жасауға ықпал ететін себептер мен жағдайлар туралы да айтып өтті.
Жалпы академиялық адалдықтың саяси мақсаты ¬ жоғары білім беру сапасын әлемдік стандарттарға сәйкестендіру, оның бәсекеге қабілеттілігін арттыру үшін оқытушылар мен студенттер арасында адалдық қарым-қатынастарын қалыптастыру, алаяқтыққа, жемқорлыққа, парақорлыққа жол бермеу болып табылады.
Онлайн конференцияға қатысқан студенттер де өз зерттеулерін ұсынды. Олар шетелдік оқу орындардың білім беру саясатын мысалға келтіріп, бұл ретте америкалық студенттердің академиялық адалдық рейтингі өте жоғары деңгейде екенін атап өтті.