ӘЧ-2018: Астана уақытымен ширек финал ойындарының кестесі жарияланды

АСТАНА. ҚазАқпарат - Футболдан Ресей жасыл алаңдарында өтіп жатқан 2018 жылғы Әлем чемпионатының ширек финал ойындары 6-7 шілде күндері өтеді. Ең алдымен Уругвай және Франция құрамалары жартылай финал жолдамасын сарапқа салады, деп хабарлайды ҚазАқпарат тілшісі.

Ойын «Нижний Новгород» стадионында өтеді. Қазақстандық жанкүйерлер кездесудің тікелей трансляциясын Qazsport телеарнасынан Астана уақытымен (келесі ойындар да - Астана уақытымен) 20:00-ден бастап тамашалай алады.

6 шілдедегі екінші ойында Уругвай-Франция матчының жеңімпазына жартылай финалда қарсылас атанатын команда белгілі болады. «Қазан Арена» стадионында өтетін Бразилия-Бельгия ойыны ширек финалдың ең тартысты кездесулерінің бірі болмақ. Оны Қазақстанның екі бірдей телеарнасы - Qazsport және Qazaqstan 00:00-ден бастап тікелей эфирден көрсетеді.

Ертеңіне, 7 шілде күні жартылай финалдың екінші жұбы анықталады. 20:00-де Сочидегі «Фишт» стадионында Ресей мен Хорватия өзара күш сынасады. Ойынды Qazsport және Qazaqstan телеарналарынан көруге болады.

Олардың қарсыласы түнгі 00:00-де «Самара Арена» стадионында болатын Швеция-Англия кездесуінде белгілі болады. Бұл ойынды да Qazsport және Qazaqstan телеарналары тікелей эфирден көрсетеді.