9 елдің ойыншылары тоғызқұмалақтан өзара мықтыны анықтайды

НҰР-СҰЛТАН. ҚазАқпарат - Қызылорда қаласында мемлекет және қоғам қайраткері Нәлқожа Ергешбаевты еске алуға арналған тоғызқұмалақтан ашық Азия кубогы басталды, деп хабарлайды ҚазАқпарат тілшісі.

Дүниежүзілік тоғызқұмалақ федерациясынан мәлім еткендей, жарыстың салтанатты ашылуына қала əкімі Нұрлыбек Нəлібаев, Дүниежүзілік тоғызқұмалақ федерациясының вице-президенті Мақсат Шотаев жəне облыстық тоғызқұмалақ федерациясының президенті Әбдіқадыр Ергешбаев қатысып, ойыншыларға сәттілік тіледі.

Сондай-ақ шара аясында Моңғолия мемлекетінің тоғызқұмалақ қауымдастығының басшысы Долдай Ербол облыстық тоғызқұмалақ федерациясының президенті Әбдіқадыр Ергешбаевқа «Құрмет орденін» табыстады.

Дүбірлі бәсекеде 9 елден, яғни Қазақстан, Ауғанстан, Әзербайжан, Қырғызстан, Түрікменстан, Өзбекстан, Түркия, Ресей және Моңғолиядан 262 тоғызқұмалақшы өзара мықтыны анықтамақ.

Жарыс классика мен блиц бойынша 9 турда, 17 жасқа дейінгі жастар және одан жоғары жастағы ерлер мен əйелдер арасында 4 топта өткізіледі.

Жеңімпаздар мен жүлдегерлер 6 наурыз күні белгілі болады.