8 қараша күні елордада автобус жүрмейді
Бұл жайында City Transportation Systems компаниясы мәлімет таратты.
«8 қарашада дезинфекциялық жұмыстардың жүргізілуіне байланысты қоғамдық көлік бір күнге тоқтайды. Дүйсенбі күні, 9 қарашада автобустар қайтадан қатынайды. Қала тұрғындарын санитарлық нормаларды сақтауға шақырамыз» деп жазды компания Instagram парақшасында.
Автобусқа маскасыз кіруге тыйым салынады. Жол ақысы қолма-қол ақшасыз, SMS көмегімен және мобильді қосымшалар арқылы төленеді.
Еске сала кетейік, елордадағы қоғамдық көлік жолаушыларына ыңғайлы болу үшін төлем жасаудың түрлі әдістері мен тарифтері қарастырылған:
- көлік әмияны - ақшаны көлік картасына аудару;
- көлік билеті - 10 сапарға арналған қағаз көлік картасы;
- «SMS арқылы төлем жасау» - ұялы байланыс операторы арқылы жол ақысын қолма-қол ақшасыз электронды түрде төлеудің қосымша қызметі;
- «QR-код арқылы төлем жасау» - жолаушының банк картасымен байланысқан мобильдік қосымша арқылы немесе абоненттік нөмірдегі теңгерімнен аудару арқылы жүзеге асырылады;
- бірлескен брендтік карта - жол ақысын электронды түрде төлеу жүйесінде пайдалануға арналған көлік картасының интеграцияланған чипі бар жеке банктік карта.
Тәуліктік жол жүру билетінің жарамдылығы сатып алынған сәттен емес, бірінші валидациядан кейін есептеле бастайды.