76 жастағы кейуананы тонаған екі әйел ұсталды - СҚО
СҚО Полиция департаменті баспасөз қызметінің мәліметінше, Покровка елді мекенінің 76 жастағы тұрғыны өзін тонап кеткендігі жайында полицияға арызданған. Зейнеткердің айтуынша, үйіне бейтаныс әйел келіп, өзін мемлекеттік қызметшімін деп таныстырған, әңгімеге тартқан. Екеуі сөйлесіп жатқанда аула сыртындағы есіктен үйге екіншісі кіріп, ақша мен алтын бұйымдарды ұрлаған. Келтірілген шығынның жалпы сомасы 580 мың теңгеден асады.
«Ұрлық жасады деген күдікпен сол күні екі әйел ұсталды. Олар мінген көлікті көрші Жамбыл ауданында тәртіп сақшылары тоқтатты. Әйелдердің біреуі Мамлютка қаласының 42 жастағы тұрғыны. Екіншісі Қостанай облысы Ұзынкөл ауданының 48 жастағы тұрғыны, бұрын сотталған екен. Тексеру барысында олардан ұрланған алтын бұйымдар мен ақша табылып, алынды», - дейді Мамлют аудандық полиция бөлімі бастығының міндетін атқарушы Жеңіс Темірбеков.
Аталған факті «Ұрлық» бабы бойынша Сотқа дейінгі тергеп-тексерулердің бірыңғай тізіліміне енгізілді. Тергеу жүргізілуде. Қазір күдіктілерді қамауға алу мәселесі шешіліп жатыр.