6alash сайты оқырманға жол тартты
Ұлттық құндылықтарды ұлықтау, мәйекті мәдениетімізді дәріптеу мақсатында құрылған бұл интернет порталы тек Қазақстандағы ғана емес, әлемнің әр еліндегі қазақтар арасында сақталған салтымыздың сарқытын оқырман назарына ұсынуға, болашақ ұрпақ санасында қайта жаңғыртуға тырысады.
«Елбасы Нұрсұлтан Назарбаевтің «Ұлы даланың жеті қыры» мақаласы өзін қазақтай дегдар ұлттың ұрпағы болғанын мақтаныш сезінетін әр қазаққа зор шабыт сыйлады. Оның үстіне, «Ұлы даланың жеті қырын» жалпақ жұртқа жарқыратып көрсетуге «Саусақ бірікпей, ине ілікпейді» дегендей, барлығымыз атсалысуымыз керек. Біз осы мақсатта 6alash-ты аштық. Сайтымыз, мәдени, рухани, тарихи дүниелерді насихаттауды көздеп отыр. Әсіресе шеттегі қазақтарда сақталған құнды мұраларды, тамаша салт-дәстүрлерімізді атажұртқа жеткізу біздің негізгі нысанамыздың бірі»-, дейді 6alash сайтын құрушылардың бірі, журналист Қалиакбар Үсемханұлы.