6 пайыздық несие: Кепіл беру мәселесі шешілуде
«Шағын және орта бизнесті қолдау үшін Ұлттық банк бағдарламасы мен «Бизнестің жол
картасы-2025» бойынша қызмет түрлері кеңейтіліп, несиелеу рәсімдері жеңілдетілуде. Қазіргі кезде микробизнесті қолдау - маңызды мәселе. Несиелерге қол жеткізу және кепіл мәселелерін шешу шағын және орта бизнестің, әсіресе микробизнестің дамуының факторы екені анық», - деді Руслан Дәленов ОКҚ-да өткен баспасөз мәслихатында.
Министрдің айтуынша, «Бизнестің жол картасы-2025» бағдарламасына «шағын және микробизнесті шағын кредиттеу» атты жаңа бағыт қосылған. Қаржыландыру субсидиялау есебінен 6%-дан аспайтын мөлшерлеме бойынша қолжетімді болады. Бүгінде мұндай несиелер бойынша мөлшерлемелер жоғары. Жаңа бағыт 6% мөлшерлемесі бойынша несие алуға мүмкіндік береді.
«Несиелер айналым қаражатын толықтыруға 5 млн теңгеге дейін және өндірістік қажеттіліктерге 20 млн теңгеге дейін берілетін болады. Қаржыландыру көздері – банктер мен микроқаржы ұйымдарының меншікті қаражаты. Бұл ретте кепіл беру мәселесі шешілуде. «Даму» қоры қарыздың негізгі бөлігінің 85%-на дейін кепілдендіруді қамтамасыз етеді. Бұл микробизнес өкілдерінің үлкен тобын қамтуға мүмкіндік береді», - деді ол.