Қолданушы баптаулары
Қолданушы баптаулары
+7 (701) 759 90 19 Лента
USD 382.38 EUR 428.30
RUB 5.97 CNY 55.39

24 мамыр. ҚазАқпарат күнтізбесі

2019 жылғы 24 мамыр 07:00
Поделиться:

НҰР-СҰЛТАН. ҚазАқпарат - ҚазАқпарат өз оқырмандарына 2019 жылғы 24 мамырға арналған күнтізбені ұсынады.

АТАУЛЫ КҮНДЕР

Халықаралық қорықтар күні

Жыл сайын Халықаралық табиғатты қорғау одағының бастамасымен аталып өтіледі. Қорықтар - табиғаттың жаратылысын және оның барлық түрлерін өзгеріссіз сол қалпында сақтайтын аумақ бөлігі немесе акватория.

ЕСТЕ ҚАЛАР ОҚИҒАЛАР

1933 жылы «Қазақтың көркем әдебиеті» баспасы құрылды. 1964 жылы атауы «Жазушы» болып өзгерді.

1994 жылы осы күні Еуропалық Одақ серіктестік және ынтымақтастық туралы келісімді - Қазақстан Республикасымен, ал бір аптадан кейін Қырғызстан Республикасымен парафирледі.

1995 жылы Қазақстан Респуликасының мемлекеттік шекара режимін нығайту мақсатында Қазақстан Республикасының шекара әскерлері бас басқармасы Қазақстан Республикасының Мемлекеттік шекараны қорғау мемлекеттік комитеті болып қайта құрылды.

2002 жылы Польша Республикасы мен Қазақстанн Республикасының арасындағы ынтымақтастықты дамытуға қосқан елеулі үлесі үшін Қазақстан Республикасының Президенті Нұрсұлтан Назарбаев «Ақ қыран» орденімен марапатталды.

«Ақ қыран» ордені - Польшаның ең жоғары мемлекеттік сыйлығы. Оны 1705 жылғы 1 қарашада Польша королі ІІ Август бекітті. Орден монархтарға, шетелдік мемлекеттер мен үкіметтердің басшыларына ерекше еңбегі үшін табыс етіледі, сондай-ақ Польша Республикасына айрықша еңбегі сіңген поляк азаматтары марапатталады.

2006 жылы Қазақстан-Қытай мұнай құбыры арқылы қазақстандық мұнайдың алғашқы партиясы ҚХР шекара бекетіне жетті. Мұнай Шынжаңның Душаньцзы қаласындағы мұнай өңдеу зауытына жеткізілуі тиіс. Бұл қазақстан-қытай мұнай құбырының ресми пайдалануға берілуін білдіреді. Құны 700 миллион доллар, өткізу мүмкіндігі 20 миллион тонналық 962 шақырым құбырдың құрылысы 2004 жылдың қыркүйек айында басталып, 2005 жылдың желтоқсан айында аяқталған болатын. Онымен қатар, Қытай аумағында 252 шақырымдық Алашаңқай-Душаньцзы құбыры да төселіп біткен еді.

2007 жылы Градец-Кралове қаласындағы Конгресс-орталықта Қазақстан Республикасының Чехиядағы Құрметті консулдығының ашылу рәсімі өтті. Консулдық округ Чех Республикасының Краловоградецк және Пардубиц өлкелерін қамтиды.

2010 жылы қазақстандық альпинистер командасы әлемдегі ең биік он төрт шыңды түгел бағындырған тұңғыш команда атанды. Біздің альпинистер бұл күні жерден сегіз мың биіктікте орналасқан Лхоцзе (8 516 м) шыңын бағындырды.

2011 жылы Қазақстанда Қарағанды облысында болған жапон әскери тұтқындары туралы кітап жарық көрді. Оның сатылымынан түскен қаражаттарды авторлар түгел Жапонияда сол жылы 11 наурызда болған жер сілкінісінен зардап шеккендерге көмек қорына аударды.

2011 жылы Алматыда қазақстандық белгілі режиссер Сләмбек Тәуекелдің «Жерұйық» халық драмасы қойылды. Фильм 30-жылдардағы ашаршылықтан кейін де қазақ халқы құшақ жая қарсы алған қазақстандық корейлер, немістер, түріктер, шешендер, курдтар және басқа халықтардың ризашылығының символы болды.

2013 жылы Загреб қаласында Қазақстан табиғаты фотокөрмесі салтанатты түрде ашылды, оны ҚР елшілігі мен Хорват «CroАrtРhotoclub» фотоөнер қауымдастығы ұйымдастырды.

2013 жылы Алтай өлкесінің (Ресей) Славгород қаласында Павлодар мемлекеттік педагогика институтының қолдауымен Қазақ тілі мен мәдениеті орталығы ашылды.

2013 жылы Алматыда «Теңізшевройл» компаниясы мен Қазақстан-Британ техника университетінің тікелей қатысуымен Қазақстандағы тұңғыш теңіз академиясы құрылып, бірінші курсқа кадеттер қабылданды.

Академияда сабақ ағылшын тілінде жүргізіледі, ал кадеттер Каспий теңізінде тәжірибеден өтеді.

2016 жылы Қазақстан Республикасы Ұлттық банкі «proof» сапасымен 100 теңгелік «Көркем гимнастика. Олимпиада ойындары 2016» ескерткіш күміс монетасын айналымға шығарды.

2016 жылы ҚР Энергетика министрлігі Ядролық физика институтының (ЯФИ) ядролық зерттеу реакторы конверсиядан және терең жаңғыртудан кейін жоғары байытылған ядролық отыннан төмен байытылған ядролық отынға көшірілді. Жаңғыртылған реакторға арналған төмен байытылған ураны бар отын жинамалары Ядролық физика институтына «Росатом» Мемкорпорациясының «ТВЭЛ» отын компаниясы бөлімшесіне қарасты Новосибирск химконцентраттар зауытымен жеткізілетін болады. ҚР Энергетика министрлігіне қарасты Ядролық физика институтының ССР-Қ зерттеу ядролық реакторын жаңғырту үдерісінде басқару және қорғаныс, радиациялық бақылау жүйелері толығымен ауыстырылған. Сонымен қатар, суыту және үздіксіз энергиямен жабдықтаушы жүйелері жаңартылды. Осының барлығының нәтижесінде реактордың қауіпсіздігі және тиімділігі арта түсті. 

2016 жылы ҚР Президенті Телерадиокешенінің «Отан үшін отқа түс!» деректі фильмі «Бірлесіп жеңдік» деректі фильмдер мен телебағдарламалардың XII халықаралық кинофестивалінде арнайы дипломға лайық деп танылды. Байқауға 150 жұмыс ұсынылған.  Фильм авторы - белгілі журналист Назгүл Әбутрапова.

2017 жылы Қазақстан - Ресей қатынастарын дамытуға, Қазақстан және Ресей халықтарының арасындағы достық пен ынтымақтастықты нығайтуға қосқан сүбелі үлесі үшін Мәскеу және бүкіл Русь Патриархы Кирилл І дәрежелі «Достық» орденімен марапатталды.

Патриарх Кириллге орденді Қазақстан Республикасының Ресей Федерациясындағы Төтенше және Өкілетті елшісі Иманғали Тасмағамбетов табыс етті.

 

 

Бөлісіңіз:
MURAǴAT