2023 жылы Қазақстан-Әзербайжан бағытында Каспий түбі арқылы байланыс желілерінің құрылысы басталады

АСТАНА. ҚазАқпарат – Цифрлық даму, инновациялар және аэроғарыш өнеркәсібі министрі Бағдат Мусин Самарқанда Орталық Азиядағы телекоммуникация индустриясының маңызды мәселелерін талқылауға қатысты, деп хабарлайды ҚазАқпарат министрдің желідегі парақшасына сілтеме жасап.

«Самарқанға сапар барысында телекоммуникация индустриясының маңызды мәселелерін талқыладық. Қазақтелеком басшылығы Байланыс саласындағы өңірлік достастық әкімшілігі басшыларымен және ITU өкілдерімен интернет-алаяқтықтың өсуіне қарсы күресті талқылауға қатысты. Бұл мәселе барлық елдер үшін өзекті және қатысушылар бұл мәселемен бірлесіп күресу туралы келісімге келді. Жасыратыны жоқ, алаяқтар SIP-телефония мүмкіндіктерін пайдаланады және қоңыраулар басқа елдердің аумағынан келеді. Әріптестермен бірлескен іс-қимыл жоспарын әзірлеу және байланыс саласындағы өңірлік достастық өкілдерімен келісе отырып, осы мәселерді ITU (халықаралық телекоммуникация одағы) деңгейінде көтеріп, шешу жолдарын қарастыру қажет деп келістік», - деп жазды Б. Мусин.

Сондай-ақ осы жиында Қазақтелеком іс-шараға қатысушыларға Орталық Азияда талшықты-оптикалық байланыс желісін салу жобасын таныстырды.

«2023 жылы Қазақстан-Әзірбайжан бағыты бойынша Каспий түбі арқылы талшықты-оптикалық байланыс желілерінің құрылысы басталады.

Жоба Орталық Азия елдеріне Интернетке баламалы қолжетімділікті қамтамасыз етуге, сондай-ақ Еуропа мен Азия арасындағы трафик транзитін кеңейтуге мүмкіндік береді.

Қазақстан тарапынан жобаның серіктесі Қазақтелеком, Әзербайжан тарапынан - Аzertelekom компаниясы болады.

Қазірдің өзінде жобаның дизайнын (HLD) әзірлеу жұмыстары басталды, содан кейін тиісті зерттеулер, кейінірек - Каспий түбіндегі «оптиканы» жобалау және салу жүзеге асады.

Су асты желісінің негізгі бағыты Ақтаудан Әзербайжанның Сиазань қаласына дейін өтеді және 340 шақырымды қамтиды, ұзындығы 330 шақырымға жуық резервтік канал Баку маңындағы қазақстандық Құрық портынан Әзербайжанның Бузовна елді-мекеніне дейін салынады.

Орталық Азияның барлық елдері жобаны жақын арада іске асыруға мүдделі, өйткені баламалы маршруттардың болуы біздің елдеріміздің тұрғындарына Интернетке кепілдендірілген қолжетімділікті қамтамасыз етуде үлкен рөл атқарады», - деп толықтырды министр.

Фото: facebook.com/BagdatMussin