2021 жылы елдің жалпы ішкі өнімі 4 пайызға өсті -Әлихан Смайылов

НҰР-СҰЛТАН. ҚазАқпарат – ҚР Премьер-Министрі Әлихан Смайылов Үкіметтің кеңейтілген отырсында өткен жылдың әлеуметтік-экономикалық көрсеткіштері туралы мәлімет берді, деп хабарлайды ҚазАқпарат тілшісі.

«2021 жылғы әлеуметтік-экономикалық даму қорытындысы бойынша жалпы ішкі өнімнің өсімі 4 процентті құрады. Тұрақты экономикалық өсімнің негізгі факторы нақты сектор болды.

Өнеркәсіп өнімінің көлемі 8,38 процентке жетті. Тау-кен өнеркәсібін есепке алмағанда негізгі экономикаға салған инвестициялар 9,5 процент ұлғайды. Тікелей шетелдік инвестициялар өткен жылдың 9 айында шамамен 50 процент өсіп, 18,8 млрд долларды құрады», - деді Үкімет басшысы.

Оның айтуынша, 11 айдың қорытындысы бойынша сыртқы сауда мен инвестиция тарту саласында біраз өсім байқалған.

«Сондай-ақ өткен жылдың 11 айының қорытындысы бойынша, сыртқы сауда айналымы 15,4 процент өсіп, 91,4 млрд долларға жетті. Ал тауарлар экспорты 25 процентке артып, 54,5 млрд долларды құраса, импорт көлемі 4,2 процент өсіп, шамамен 37 млрд доллар болды», -деді Әлихан Смайылов.