2020 жылғы Армия халықаралық ойындары аяқталды
Армия халықаралық ойындары 2015 жылдан бері өткізіліп келе жатыр. Биыл оған 30-дан астам мемлекет қатысты.
«АрХО-2020» ойындарының жабылу рәсіміне елдердің қорғаныс ведомстволарының басшылары мен делегациялары қатысты.
Қазақстан Қорғаныс министрі генерал-лейтенант Нұрлан Ермекбаев салтанатты рәсім басталғанға дейін «Танк биатлоны» сайысына қатысқан қазақстандық командамен кездесті.
Ойындардың жабылу салтанатының алдында, «Танк биатлоны» сайысының финалы және экипаждардың финалдық жүрістерінің қорытындысы шығарылды. ҚР командасы 5-орын алған болатын.
«Аталған іс-шаралар аясында Н. Ермекбаев басқа мемлекеттердің қорғаныс министрлерімен кездесті. Атап айтқанда, Үнді әріптесі Раджнатх Сингхпен БҰҰ қамқорлығымен бітімгершілік операцияларына бірлесіп қатысуға басты назар аударылды. Мұндай өзара іс-қимыл 2018 жылдың қазан айынан бастап жүзеге асырылуда. Қазақстандық ротаның төртінші құрамы Ливандағы Үнді батальоны құрамындағы міндеттерді орындауда», - деді ҚР Қорғаныс министрлігінен.
Еске салайық, 4 қыркүйек күні «Патриот» әскери-патриоттық паркінде ШЫҰ, ТМД және ҰҚШҰ-ның қорғаныс ведомстволары басшыларының бірлескен отырысы өткен болатын.
«Ресей Қорғаныс министрі армия генералы Сергей Шойгудың бастамасымен алғаш рет өткізілген қорғаныс ведомстволары басшыларының кездесуінің өкілдік форматы кең ауқымды мәселелер бойынша жан-жақты пікір алмасуға мүмкіндік берді», - делінген таратылған ақпаратта.
