2014 жылғы Қазақстан барысы Мұхит Тұрсынов магистрлік диплом алды

АЛМАТЫ. ҚазАқпарат - Бүгін Қазақ спорт және туризм академиясының магистратурасын бітірушілерге дипломдар табысталды. Оқу орнын тәмамдағандардың ішінде "Қазақстан барысы-2014" додасының жеңімпазы Мұхит Тұрсынов, Пекин Олимпиадасының қола жүлдегері Нұрбақыт Теңізбаев, Қазан Универсиадасының қола жүлдегері Әлихан Жұмаев, самбодан 2014 жылғы Қазақстан чемпионы Алтынай Балтина бар.

"Бізде бірнеше Олимпиада чемпионы бар. Ал Қазақстан барысы жалғыз",- деді оқу орнының ректоры Закирьянов Қайрат балуанға дипломды табыстай отырып.

Айта кетейік, Мұхит Тұрсынов Семей мемлекеттік университетінің дене тәрбиесі және спорт кафедрасында мұғалім болып қызмет етеді. Бүгін оған академия ректоры тарапынан "ұлттық спорт" кафедрасына мұғалім ретінде орналасу ұсынылды. Мұхит өзінің докторантураға түсуге әлі асықпайтынын айтты. "Алда әлі Азия чемпионаты, Еуразия барысы сияқты дүбірлі додалар бар. соған дайындалуым керек. Осы жолы Қазақстан барасына қатысатын кезде соңғы 3-4 ай сабақтан қалуыма тура келді. Әрине, мұғалімдердің келісімімен", -деп жымиды балуан. Сонымен қатар, спортшы турнирде жеңіп алған ақшасын қайда жұмсайтынын айтты. "Мен 150 мың долларды өзімнің ата-анама, менің осы деңгейге жетуіме үлес қосқан адамдарға беремін. Мені әкем мен Ербол Мырзағасынов деген бапкерім төрт жыл бой үздіксіз дайындады. Ол кісі бүкіл қарсыласымды таспаға түсірді. Олардың арқасында менің әр қарсыласыма пайдаланатын өзіндік тактикам болды. Ол спортшылармен үнемі кездесіп жүрміз ғой. Бірақ, осы жолы менің Бейбіт Ыстыбаевты жеңе алатынымды дәлелдегім келді",- деді спортшы.