17,4 миллион адам санақ сауалдарына жауап берді
Ұлттық статистика бюросының басшысы Нұрболат Айдапкеловтің айтуынша, қазақстандықтардың 91,6%-і немесе 17 428 058 адам Жалпыұлттық халық санағына қатысты. Азаматтардың 40,4%-і санақтан онлайн, 51,2%-і офлайн өтті.
«Санақтан өткендер саны бойынша Алматы қаласы көш бастап тұр. Мұнда санаққа қатысқандар қатары бұған дейін тіркелген халық санына шаққанда 107,5%-ы. Яғни, қолда бар мәлімет бойынша Алматы тұрғындарының саны 2 005 496 деп көрсетілген. Ал санақ сауалдарына 2 154 907 адам жауап берген. Демек, халық санағы қазірдің өзінде мегаполис халқының нақты санын көрсетуге көмектесетінін сеніммен айта аламыз»,- деді Нұрболат Айдапкелов.
Екінші орында Түркістан облысы, онда халық санағына 98,6% немесе 2 032 333 адам қатысты. Үшінші орында Жамбыл облысы, мұндағы санақтан өткендер саны халықтың 98,6%-ін немесе 1 129 863 адамды қамтиды.