16 желтоқсан - Тәуелсіздік күні елордада отшашу болмайды

НҰР-СҰЛТАН. ҚазАқпарат – Елордада Тәуелсіздік күнінде отшашу болмайды. Бұл туралы қалалық әкімдіктің баспасөз қызметінен мәлім болды, деп хабарлайды ҚазАқпарат тілшісі.

Айта кетейік, Тәуелсіздік күніне орай төрт күн қатарынан, яғни 16,17,18 және 19 желтоқсан демалыс болады. 18 желтоқсандағы жұмыс күні 20 желтоқсандағы жексенбіге ауысты.

Елорда әкімдігі алдағы мереке күндерінде індеттің таралуына жол бермеу мақсатында тиісті санитарлық талаптарды орындауға шақырды.

Осы орайда маска тағу режимін, әлеуметтік арақашықтықты сақтау мен өзге де қажетті ережелер орындалуы тиіс.

Бұдан бұрын хабарланғандай, Нұр-Сұлтан қаласының әкімі Алтай Көлгінов алдағы мерекелерді отбасымен өткізуге кеңес берді.

Еске салсақ, Нұр-Сұлтан қаласы «қызыл» аймаққа өтті.