16 жасар жасөспірім Жайыққа батып бара жатқан баланы құтқарды
Облыстық полиция департаментінің баспасөз қызметінен мәлім еткендей, оқиға 2 қыркүйекте, сағат 18:00 шамасында болған.
«Атырау қаласындағы дене шынықтыру-спорт кешенінің тұсында Жайық өзеніне батып бара жатқан баласын әкесі құтқармақ болған. Осы кезде шағын қайықпен өтіп бара жатқан 16 жастағы Евгений Русаков жедел көмекке ұмтылған. Стационарлық бекетте кезекшілік атқарып жүрген патрульдік полиция батальонының қызметкерлері, полиция лейтенанты Ақжол Қибатоллаев пен полиция аға лейтенанты Бердібек Хабибуллаев та көмекке келді», - деп хабарлады департаменттің баспасөз қызметінен.
Кейін полицейлер 30 жастағы ер адам мен оның 2019 жылы туған ұлын Жайық өзенінің жағалауына шығаруға көмектесіп, жедел жәрдем шақырды. Әкесі мен баласына алғашқы медициналық көмек көрсетілді.
Полиция ұсынған видеоға сүйенсек, отбасы катамаран жалдаған. Қазір өзенде адам тасымалдаудың қауіпсіздігін қадағаламаған жауапты тұлғаларға қатысты іс-құжаттары жинақталып жатыр.
Бұған дейін Атырауда әкелі-балалы екеу Жайық өзеніне батып кеткенін хабарлаған болатынбыз.
Облыстық төтенше жағдайлар департаменті қоғаммен байланыс тобының мәліметінше, әкесі мен баласы Жайық өзенінің суға түсуге жабдықталмаған тұсында батып кеткені анықталды. Әкесі 35-те, ал, баласы 9 жаста болған.