15 жоғары оқу орны HR саласы бойынша мамандар даярлауда

2022 жылғы 9 желтоқсан, 13:03
15 жоғары оқу орны HR саласы бойынша мамандар даярлауда

АСТАНА. ҚазАқпарат – ҚР Президентінің жанындағы Мемлекеттік басқару академиясында персоналды басқару қызметтерінің өкілдері үшін тиісті оқыту курстары өткізіледі. Бұл туралы Мемлекеттік қызмет істері агенттігінің төрағасы Дархан Жазықбаев айтты, деп хабарлайды ҚазАқпарат тілшісі.

«Қазір ҚР Президентінің жанындағы Мемлекеттік басқару академиясын қоса алғанда, Қазақстанда 15 жоғары оқу орны HR саласы бойынша маман даярлайды. Соның ішінде бакалавр деңгейінде – 8, магистратура деңгейінде – 10 білім беру бағдарламасы бар», - деді Д. Жазықбаев елордада өтіп жатқан «Мемлекеттік қызметтегі HR: персоналды стратегиялық басқаруға көшу» форумында.

Оның айтуынша, агенттікті толыққанды стратегиялық HR институтқа айналдыру мақсатында аталған академияның жоғары әлеуеті ескеріліп, ол келешекте адами ресурстарды даярлау, олардың біліктілігін арттыру бойынша ғылыми-зерттеу орталығы болмақ.

«Академияда персоналды басқару қызметтерінің өкілдері үшін тиісті оқыту курстары өткізіліп, олар сертификатталатын болады. Жоспарланған курстар болашақта HR-қызметтерін түрлендіріп, жоғары әлеуеті мен сұранысы бар таланттар – HR кәсіпқойлар пулын құруға мүмкіндік береді. Жалпы, мемлекеттік қызмет саласындағы өзгерістер адам ресурстарын тиімді пайдалану арқылы кәсіби мемлекеттік аппарат қалыптастырып, қоғамның талаптарын қанағаттандыру мен халықтың әл-ауқатын арттыруға бағытталған», – деп атап өтті Дархан Жазықбаев.

Бұдан бұрын хабарланғандай, мемлекеттік қызметке орналасуда конкурстық рәсімді өткізу форматы қайта қаралды.


Серіктестер жаңалықтары

Jańalyqtar