Қолданушы баптаулары
Қолданушы баптаулары
+7 (701) 759 90 19 Лента
USD 371.56 EUR 422.43
RUB 5.56 CNY 53.51

12 шілде. ҚазАқпарат күнтізбесі: Атаулы күндер, оқиғалар, есімдер

2018 жылғы 12 шілде 06:50
Поделиться:

АСТАНА. ҚазАқпарат - ҚазАқпарат оқырмандарына 2018 жылғы 12 шілдеге арналған күнтізбесін ұсынады.

12 шілде, БЕЙСЕНБІ

Дүниежүзілік азаматтық авиация бортсерігі күні

Бұл мамандықтың пайда болғанына 90 жыл толып отыр. 1928 жылы Германияда алғаш рет ұшу кезінде экипаж құрамына ұшақ бортындағы жолаушылардың қауіпсіздігін қамтамасыз етуге арнайы жауапты адам енгізілген болатын.

Сан-Томе және Принсипи Демократиялық Респуликасының Ұлттық мейрамы - Тәуелсіздік күні (1975)

Сан-Томе және Принсипи - Гвинея шығанағындағы осы аттас аралдарда және Африканың батыс жағалауындағы басқа да ұсақ аралдарда орналасқан мемлекет. Астанасы - Сан-Томе қаласы. Ресми тілі - португал тілі. Ақша бірлігі - добра. Мемлекет басшысы - Президент. Заң шығарушы органы - Ұлттық халықтық жиналыс. Экономикасының негізгі тірегі - ауыл шаруашылығы. Экспортқа какао, кофе, пальма, банан шығарады. Негізгі сауда серіктестері -Португалия мен АҚШ.

Кирибати Республикасының Ұлттық мейрамы - Тәуелсіздік күні (1979) 

Кирибати - Тынық мұхитының батыс бөлігіндегі аралдар мен атолдарда орналасқан мемлекет. Кирибати құрамына Гилберта, Лайн, Феникс, Банаба аралдары кіреді. Астанасы - Байрики қаласы. Ресми тілі - ағылшын тілі, сонымен қатар барлық халқы тунгаруан (кирибати) тілінде де сөйлейді. Ақша бірлігі - Австралия доллары. Британ достастығы құрамына кіреді. Мемлекет басшысы - Президент. Заң шығарушы органы - Ассамблея палатасы.

Ұлы Вероника күні (Фотографтар күні)

Ұлы Вероника фотосуреттердің қорғаушысы болып есептеледі. Бұл күн сондай-ақ фотографтар күні деп те аталады.

ЕСТЕ ҚАЛАР ОҚИҒАЛАР

1838 жылы Исатай Тайманов пен Махамбет Өтемісов бастаған көтерілісшілер қолы Ақбұлақ пен Қиыл аралығындағы шайқаста Гекке әскерінен жеңіліске ұшырады. Осы шайқаста Исатай қаза тапты.
1924 жылы Орта Азияда ұлттық шекара бөлісі аяқталды. Қазақ АКСР-інің астанасы Орынбордан Ақмешітке (кейін Қызылорда деп аталды) көшірілді.
1925 жылы Қазақстан Жазушылар одағы құрылды. Оның алғашқы басшылары - Сәкен Сейфуллин мен Бейімбет Майлин. Одақ құрамында проза, поэзия, драматургия, сын, көркем аударма, очерк, сатира, фантастика, балалар әдебиеті, орыс, неміс, корей, ұйғыр әдебиеті жөніндегі шығармашылық кеңестер жұмыс істеді. 1925 жылы Қазақстан Жазушылар одағының он шақты ғана мүшесі болса, қазіргі уақытта 900-ге жуық мүшесі бар. Қазақстанның 11 облысы мен Астана қаласында бөлімшелері бар.
1925 жылы А.В.Затаевичтің «Қазақ халқының 1000 әні» жинағы баспадан шықты.

1960 жылы Қазақ ССР Мәдениет министрлігінің №125 бұйрығымен Жамбыл атындағы мемлекеттік филармониясының эстрада секторы негізінде «Қазақконцерт» Қазақ мемлекеттік гастрольді-концерттік бірлестігі құрылды. 2006 жылы «Қазақ әуендері» АО филиалы - «Қазақконцерт концерттік бірлестігі» болып өзгертілді. 

2016 жылдың қаңтарында «Қазақконцертке» Қазақстан Республикасы Мәдениет және спорт министрлігі Мемлекеттік ұйымы мәртебесі беріледі. Енді «Қазақконцерт» өз қызметін Қазақстанның астанасында еліміздегі ірі концерттік зал - «Қазақстан» орталық концерт залының негізінде жалғастырады.

«Қазақконцертте» барлық жанрлар ұсынылған: халық өнері, классика, эстрада. Шығармашылық құрамға фольклорлық-этнографиялық ансамбль, «Солистер академиясы» мемлекеттік камералық оркестрі, «Astana Musical» театры, эстрадалық және опералық әншілер кіреді.

1996 жылы Омбы облысында жазушы Қошке Кемеңгеровтің туғанына 100 жыл толу мерейтойы аталып өтті.

1993 жылы Алматыда Түркия, Әзербайжан, Қазақстан, Өзбекстан, Қырғызстан және Түркіменстан елдерінің бастамасымен ТҮРКСОЙ Халықаралық мәдени ұйымы құрылды.  Бұл елдер ұйымды құрушы мемлекеттер болып есептеледі. Сәл кейінірек ұжымдық шартқа бақылаушы ел ретінде Татарстан, Башқұртстан, Солтүстік Кипр, Хакасия, Гагауз, Тыва қосылды.

Аталмыш ұйым түркітілдес халықтардың арасындағы рухани байланыстарды жаңғырту мақсатында құрылды.

2007 жылы Ереванда Қазақстан Республикасының Армения Республикасындағы Елшілігі ресми түрде ашылды. Бұл шараға Арменияның министрліктері мен ведомстволарының, дипломатиялық корпустың, іскер топтардың өкілдері, Еревандағы қазақ диаспорасы қатысты.

2007 жылы Маңғыстау облысындағы «Қарақұдықмұнай» кенішінде мұнай құятын теміржол эстакадасы пайдалануға берілді. «Қарақұдықмұнай» кеніші Ақтаудан 360 шақырым жерде орналасқан. Жаңа теміржол эстакадасы мұнайды балама жолмен жөнелтуді қамтамасыз етеді. Эстакада қазiргi заманғы жабдықтармен, газды ортаны бақылайтын автоматика және телемеханика жүйелерiмен, өрт қауіпсіздігі және жарылыс стандарттарына сәйкес келетін өрт сөндіру кешенімен толығымен жабдықталған.

2007 жылы Қазақстан Республикасының Ұлттық қауіпсіздік комитеті Ақтөбе облысы бойынша департаментінің ғимаратына генерал-майор Балғабай Байжігітовті еске алуға арналған мемориалды тақта орнатылды.
Қазақстан Республикасының Ұлттық қауіпсіздік комитетінің құрметті қызметкері болған Балғабай Байжігітов Ұлы Отан соғысына қатысқан, қатардағы жауынгерден генерал-майор шеніне дейін көтерілген, Мемлекеттік қауіпсіздік комитетінің облыстық органдарының басшысы болған. Ол Мемлекеттік қауіпсіздік комитетінің Ақтөбе облысы бойынша басқармасын 1970-1985 жылдары басқарған. І дәрежелі Отан соғысы, «Қызыл Жұлдыз» орденімен, екі рет «Мемлекет қауіпсіздігінің құрметті қызметкері» төс белгісімен марапатталған.

2010 жылы Қазақстан Республикасы Сыртқы істер министрлігінің қолдауымен «Caspian Publishing House» баспасы дайындаған «Қазақстан-ЕҚЫҰ-2010» кітабы жарық көрді. Кітап қазақ, орыс, ағылшын тілінде басылып шықты.

2012 жылы ҚР Статистика бойынша агенттігі Дүниежүзілік банкпен бірлесіп ҚАЗСТАТ жобасын іске қосты.

2012 жылы ШҚО Күршім ауылында «Қазақ елі» монументі салтанатты түрде ашылды. Күршімдегі монумент - Астана қаласындағы монументтің көшірмесі. Қазақстан тәуелсіздігі 20 жылдығына орай, монумент биіктігі де - 20 метр.

2012 жылы Оңтүстік Корея, Қытай, Қазақстан және Өзбекстанды жалғайтын контейнерлік пойыздардың жаңа бағыты іске қосылды.

Бағыт Оңтүстік Кореядан бастау алып, Циндао (Шаньдун провинциясы) қытай портына келеді. Қазақстан-Қытай шекарасындағы «Алашанькоу-Достык» өткелінен өтіп, Аблық станциясына (Өзбекстан) жетеді.

Жаңа халықаралық контейнерлік бағыт «ҚТЖ» ҰК» АҚ және «Қазтрансервис» қатысуымен ұйымдастырылған.

2012 жылы «ЮНЕСКО-ның «Адам және биосфера» бағдарламасының халықаралық үйлестіру кеңесі (ХҮК) Қорғалжын мемлекеттік табиғи қорығын ЮНЕСКО-ның Бүкіләлемдік биосфералық резерваттар желісіне енгізді.

Астананың оңтүстік-батысына қарай 130 шақырым жерде орналасқан Қорғалжын қорығы - әлем картасында айрықша орын алатын сулы да нулы аймақ. Қорық көлемі 259,9 мың гектар жерді алып жатса, оның 198 мың гектары акваторий саналады.

2013 жылы Астанада «Тарлан» мұз алаңы ашылды.

2014 жылы Павлодарда әйгілі Батыр Баянға (1710/15-1757)  арналған ескерткіш ашылды.

2014 жылы Қазақстанда Джун Ри таэквондо бойынша тұңғыш әлем чемпионаты өтті, оған Қазақстаннан 200-ден астам спортшы және ТМД елдерінен, сондай-ақ, Оңтүстік Африка Республикасы, Оңтүстік Корея және Қытайдан келген 200-дей таэквондошы қатысты.

2015 жылы Санкт-Петербургте қазақтың соңғы ханы Кенесары Қасымұлының мәйітін іздеу және тарихи Отанына қайтару туралы қоғамдық қозғалыс құрылды.

2017 жылы ірі көлемді әрі әйгілі жол нұсқаушы Lonely Planet басылымы 2017 жылы туристер міндетті түрде баруы керек Азиядағы үздік 10 қаланың тізіміне Астананы қосты.

Басылым сарапшылары Астананы 5-орынға орналастырды. Lonelyplanet.com сайты Қазақстанның бас қаласын өзінің биік ғимараттарымен, кең алаңдарымен және қалың шыныдан жасалған пирамидасымен танымал екенін атап өтіп, Елбасы Нұрсұлтан Назарбаевтың футуристік көрінісінің келбеті деп баға берді.

ЕСІМДЕР

12 шілде. ҚазАқпарат күнтізбесі: Атаулы күндер, оқиғалар, есімдер92 жыл
 бұрын (1926-1980) музыка зерттеушісі, педагог, домбырашы, Қазақ КСР еңбек сіңірген өнер қайраткері, КСРО Композиторлар одағының мүшесі ТАСТАНОВ Хабидолла дүниеге келді.

Ақтөбе облысы Мұғалжар ауданында туған. Қазақ ұлттық консерваториясын бітіріп, ұзақ жылдар бойына халық аспаптар кафедрасында ұстаздық еткен. 1959-1961 жылдары - КСРО Мәдениет министрлігінің жолдамасымен Ұланбатырда (Моңғолия) моңғол өнері он күндігін ұйымдастыру және өткізу жұмысына басшылық жасап, Баян-Өлгей музыкалық-драма театры жанында қазақтың тұңғыш халық аспаптары оркестрін ұйымдастырған. Осы еңбектері үшін 1960 жылы Моңғол Халық Республикасының «Алтын жұлдыз» орденімен марапатталған. Оның «Алатау аясында», «Тыңға аттану», «Толғау», «Қазақ биі», «Қуанамын», «Романс», т.б. аспаптық және вокалдық шығармалары, «Домбыра оркестрі», «Домбыра үйрену мектебі», «Дирижерлік етудің негіздері» (Латиф Хамидимен бірге) атты кітаптары бар.


12 шілде. ҚазАқпарат күнтізбесі: Атаулы күндер, оқиғалар, есімдер68 жыл
 бұрын (1950)  «Astana Ballet» ЖШС директоры КУЗЕМБАЕВ ВАЛЕРИЙ Альбекович дүниеге келді.

Жамбыл қаласында дүниеге келген. Құрманғазы атындағы Алматы мемлекеттік консерваториясының оркестр факультетін бітірді (1974).

Еңбек жолы: Абай атындағы Қазақ мемлекеттік академиялық опера және балет театрындағы симфониялық оркестр әртісі (1969 жылдан); ҚазКСР Мәдениет министрлігі өнер басқармасының басшысы (1979 жылдан); «Қазақконцерт» Қазақ мемлекеттік концерт бірлестігінің бас директоры (1987-2003 жылдары); ҚР Мәдениет және ақпарат министрлігі өнер департаментінің директоры (2003 жылдан); Қазақстанның музыка қайраткерлері одағының атқарушы директоры (2009 жылдан). 2014 жылдан бері қазіргі қызметінде.

«Құрмет» (2006) орденімен марапатталып, «Қазақстанның еңбек сіңірген қайраткері» (1995) атанды.


12 шілде. ҚазАқпарат күнтізбесі: Атаулы күндер, оқиғалар, есімдер56  жыл
 бұрын (1962) Ғ. Мүсірепов атындағы Қазақ мемлекеттік академиялық балалар мен жасөспірімдерге арналған театрдың актрисасы Райхан Нәбиолдақызы ҚАЛИОЛДИНА дүниеге келген.

Талдықорған облысы Ақсу ауданы Ақсу ауылында туған. Алматы мемлекеттік театр-көркемөнер институтын бітірген (1983), драма және кино актрисасы. 1983 жылдан бері Ғ.Мүсірепов атындағы Қазақ мемлекеттік академиялық балалар мен жасөспірімдер театрының актрисасы. Ғ. Мүсіреповтің «Ақан Сері - Ақтоқты» (Ақтоқты), М.Әуезовтің «Алуа» (Жанар), М.Баджиевтің «Ерте, ерте, ертеде» (Зимха ханшайым), У.Шекспирдің «Махаббат айдыны» (Ева), Е.Елубаевтың «Асар» (Мекиен), М.Ахмановтың «Алдардың айласы» (Сипр) және өзге де спектальдерде ойнайды.
«Дарын» Мемлекеттік сыйлығының лауреаты, «Ерен еңбегі үшін» медалінің иегері, Қазақстанның еңбек сіңірген қайраткері.

  


12 шілде. ҚазАқпарат күнтізбесі: Атаулы күндер, оқиғалар, есімдер38 жыл
 бұрын (1980) «Elorda Аqparat» ЖШС директоры Қайсар ЖҰМАБАЙҰЛЫ дүниеге келді.

Әл-Фараби атындағы Қазақ ұлттық мемлекеттік университетін журналистика мамандығы бойынша бітірді.

1997-2009 жылдар аралығында түрлі БАҚ саласында қызмет атқарды. Олардың қатарында: «Столичное образование», «31 арна», «Қазақстан» РТРК, «Хабар» АҚ бар. Астана әкімінің кеңесшісі болды.

2017 жылдың қаңтар айынан бастап қазіргі қызметінде.

 

 

Бөлісіңіз:
MURAǴAT