100-ден астам адам күнгейдегі Сары Айғыр шыңын бағындырды

АСТАНА ҚазАқпарат -. «Kazakh Tourism ҰК» АҚ Астананың 20 жылдығына орай өткізіліп жатқан шаралар аясында Түркістан облысында альпиниада ұйымдастырды. Қатысушылар ауырлығы 1Б категориясында Солтүстік жота бойымен Сары-Айғырдың шыңына шықты. Альпиниадаға 16 жастан жоғары 100-ден аса адам қатысты, деп хабарлайды ҚазАқпарат «Kazakh Tourism ҰК» АҚ баспасөз қызметіне сілтеме жасап.

Еске сала кетейік, альпиниада «Қазақстанның 20 тау шыңын бағындыру» жобасы аясында ұйымдастырылды.

Альпинистердің алғашқы шыққан шыңы - Қазақстан Республикасы Президенті Нұрсұлтан Назарбаевтың атындағы шың болды.

«Kazakh Tourism ҰК» АҚ басқармасының басшысы Рашид Күзембаевтың айтуынша, ауқымды шара әлі де жалғасуда.

«Жоба аяқталған бойда альпинистеріміз Түркістан облысындағы Сайрам-Өгем ұлттық паркінде соңғы шыңды бағындырып, оны «Астананың 20 жылдығының шыңы» деп атаймыз», - деді Р. Күзембаев.

«Қазақстанның 20 тау шыңы» жобасының негізгі мақсаты - бағыттар мен соқпақтарды нақты анықтап, аталмыш бағыттарға жақын инфрақұрылымдарды дамыту бойынша ұсыныстар енгізу.

Елордамыз Астананың 20 жылдығына орай «Ел жүрегі - Астана» атауымен арнайы ұйымдастырылған іс-шараларды жүзеге асыру аясында ел астанасында ғана емес, сондай-ақ, қала сыртында да әртүрлі шаралар өткізілуде.

Экспедицияның аяқталуына арналған баспасөз мәслихаты Астана қаласында 2018 жылғы 22 қыркүйекте сағат 11:00-де өтеді.

Фото: sxodim.com