1 млрд долларды елге қайтару бойынша жұмыс жүріп жатыр - Қаржы министрі

НҰР-СҰЛТАН. ҚазАқпарат – ҚР Премьер-Министрінің орынбасары – Қаржы министрі Ерұлан Жамаубаев сыртқа заңсыз шығарылды делінген 1 млрд доллар көлеміндегі қаражатты қайтару бойынша жұмыс жүріп жатқанын айтты, деп хабарлайды ҚазАқпарат тілшісі.

«Қаржы министрлігі тарапынан Ұлттық банкпен айтылған статистикалық ақпараттың бәрін зерттеп, сараптағанбыз. Соның нәтижесінде Қаржылық мониторинг агенттігіне 8 іс бойынша шамамен 1 млрд АҚШ долларына жуық заңбұзушылық деп тапқан, тәуекелі бар істерді берген болатынбыз. Олар қазір тергеу жұмыстарын жүргізіп жатыр. Бас прокуратураның тарапынан 20-дан астам құқықбұзушылыққа байланысты іс қозғалған болатын. Сол қозғалған істер бойынша шамамен 1 млрд АҚШ долларына болжанып отыр. Бірақ нақтылай ақпаратты, қай кездегі немесе немесе қандай субьектілер бойынша екенін құқық қорғау органдарынан алу керек», - деді министр.

Еске салсақ, ҚР Ұлттық экономика министрі Әлібек Қуантыров Қазақстан аумағынан заңсыз шығарылған капитал 100 млрд доллардан асуы мүмкін екенін айтқан болатын.