+7 (701) 759 90 19 Лента
14 °С : استانا
32 °С : الماتى
USD 346.68 EUR 404.02
RUB 5.47 CNY 51.15
جاڭالىقتار

پايدالى ءارى ارزان 10 ويىنشىق

14 تامىز 02:03 1013
:ءبولىسۋ
پايدالى ءارى ارزان 10 ويىنشىق

 استانا. قازاقپارات -  بالا ويىنشىقپەن وسەدى. سوندىقتان، بالالارىمىزدىڭ قانداي ويىنشىقپەن، نەندەي ويىن ويناپ جۇرگەنىنە ءمان بەرگەنىمىز ءجون.

جان- جاعىنداعىنى ەندى عانا كورىپ- ءبىلىپ جاتقان بالانىڭ پسيحيكاسىنا، ويلاۋ قابىلەتىنە ەڭ الدىمەن اسەر ەتەتىنى - قولىنداعى ويىنشىعى. بۇگىنگى نارىقتا ويىنشىقتىڭ ءتۇرى كوپ، كەز كەلگەنىن تاباسىز. ءتۇرى، ءتۇسى، كولەمى، باعاسى دا ءارقالاي. بالاڭىز ءۇشىن وسىلاردىڭ ىشىنەن پايدالىسىن، ساپالى ءارى قالتاڭىزدى قاقپايتىن ارزانداۋىن قالاي تاڭداۋعا بولادى؟ 3-5 جاس ارالىعىنداعى بالالار ءۇشىن پايدالى ويىنشىقتاردىڭ وندىعىمەن تانىس بولىڭىزدار.

 قۇراستىرماقتار

ەگەر بالاڭىز 3-5 جاس ارالىعىندا بولسا، وندا بۇل ويىنشىقتىڭ سىزگە كەرەك ءتۇرىن دۇرىس تاڭداڭىز. تىم ۇساقتارى قاجەت ەمەس: بىرىنشىدەن، بالاڭىز ونى اۋزىنا سالىپ، جۇتىپ قويۋى مۇمكىن؛ ەكىنشىدەن وتە كىشكەنتاي بولشەكتەردى قۇراستىرۋعا بالانىڭ قابىلەتى جەتە قويمايدى، ءارى ولار تەز جالىقتىرىپ جىبەرەدى. سوندىقتان قۇرستىرماقتاردىڭ قۇلاق، مۇرىن قۋىسىنا سىيمايتىنداي ۇلكەنىرەك جانە بالانى قىزىقتىراتىن ءتۇرلى- ءتۇستى بولعانى ابزال. قۇراستىرماقتار بالانىڭ اقىل- ويىن دامىتۋعا وتە قاجەت. ءتۇرلى فيگۋرالارمەن كەز كەلگەن فورمانى قۇراستىرۋ كىشكەنتايىڭىزدىڭ وي- ءورىسىن، ەستە ساقتاۋ قابىلەتىن ارتتىرىپ، ساۋساقتارىن دۇرىس جۇمىس ىستەۋگە يكەمدەيدى. ءبىر عانا قۇراستىرماق ويىنشىعىنان بالاڭىز بىردە ءزاۋلىم ساراي جاساپ ويناسا، ەندى بىردە كولىك، قۇس- جانۋارلار، ت. ب. قۇراستىراتىن بولادى. باعالارى شامامەن 800-دەن باستالىپ،  10000 تەڭگەگە دەيىن بارادى. بۇل ويىنشىق قورابىنداعى قۇراستىرماقتاردىڭ سانىنا جانە ونداعى بولشەكتەردىڭ ارتۇرلىگىنە بايلانىستى.

 پازلدار

 بۇلار دا قۇراستىرماقتاردىڭ ءبىر ءتۇرى دەۋگە بولادى. بالانىڭ ويلاۋ قابىلەتىن، ەستە ساقتاۋىن ارتتىرادى. تەك پازلدار الدىن الا دايىندالعان ءبىر عانا جۇيە بويىنشا، ياعني ءبىر سۋرەت، جانۋار- قۇستىڭ بەينەسى، ت. ب. قۇراستىرىلادى. مۇندا دا بالانىڭ جاسىنا قاراي تاڭداۋ كەرەك ەكەنىن ۇمىتپاڭىز. تىم ۇساق پازلدار بالاڭىزدى تەز جالىقتىرادى. باعالارى 200-2000 تەڭگە ارالىعىندا. اقىل- ويدى دامىتۋشى ويىنشىقتار

 ولاردىڭ ءتۇرى كوپ: ساناماقتار، ويىنشىق جۇمساق- كىتاپتار، ءتۇرلى پىشىندەر، تاعىسىن تاعى. تۇستەر مەن پىشىندەردى اجىراتۋعا، ساناۋدى، ارىپتەردى ۇيرەنۋگە، بەلگىلى ءبىر تاپسىرمالاردى ورىنداۋعا قۇرىلعان مۇنداي ويىنشىقتار بالالاردىڭ اقىل- ويىن دامىتىپ، ەستە ساقتاۋ قابىلەتىن ارتتىرادى. ويىن بارىسىندا ءار كەزەڭنەن وتە وتىرىپ، كىشكەنتايلار جەڭىسكە، العا ۇمتىلاتىن بولادى. مۇنداي ويىنشىقتاردىڭ باعاسى ونداعى تاپسىرمالاردىڭ ارتۇرلىگىنە بايلانىستى. شامامەن 800-دەن  000 10تەڭگە كولەمىندە.

 بەلگىلى ءبىر كاسىپكە بايلانىستى ويىنشىقتار

عالىمداردىڭ زەرتتەۋىنشە، ءبىزدىڭ نە نارسەگە يكەمدى بولارىمىز كىشكەنتايىمىزدا ويناعان ويىنشىقتارىمىزعا دا بايلانىستى كورىنەدى. ەندەشە، بالامىزدىڭ بولاشاقتا كىم بولارىن وينايتىن ويىنشىقتارىنا قاراپ، بولجاپ كورۋىمىزگە بولادى. دارىگەردىڭ اسپاپتارىن، باعباننىڭ، قۇرىلىسشىنىڭ، ۇستانىڭ قۇرال- سايماندارىن، اسپازدىڭ ىدىس- اياعىن جانە ت. ب. الىپ بەرىڭىز. بۇل ويىنشىقتارمەن بالاڭىزدى ويناتىپ قانا قويماي، ەڭبەككە دە باۋليسىز. باعاسى  2000- 000  15تەڭگە ارالىعىندا.

 قۇمدا وينايتىن ويىنشىقتار

ياعني كىشكەنتاي شەلەك، كۇرەك، تىرما، سۇزگى سياقتى ءتۇرلى سايماندار مەن قۇم تاسيتىن كولىكتەر. كۇن جىلىدا بالاڭىز بۇل ويىنشىقتارمەن ەسىك الدىنداعى قۇمدا ويناسا، قىستىكۇنى قار كۇرەپ، سىزگە «قولعابىس» جاساماق. بۇل دا - ەركەڭىزدى ەڭبەككە باۋليتىن ويىنشىقتىڭ ءبىرى. باعاسى 500-2500 تەڭگە ارالىعىندا.

ويىنشىق كولىكتەر مەن قۋىرشاقتار

قىزدار ءۇشىن قۋىرشاقتار مەن ۇل بالالاردىڭ سۇيىكتى ويىنشىعى - كولىكتەر اركەز ءبىرىنشى ورىندا. الايدا كەيبىر اتا- انالار قىزىنا تەك قۋىرشاق، ۇلىنا تەك كولىك الىپ بەرۋ كەرەك دەپ ويلايدى. بۇل - ۇلكەن قاتەلىك. ءبىرىڭعاي ويىنشىقتان بالا تەز جالىعادى. سوندىقتان قازاقشا سويلەيتىن، ءان، ەرتەگى ايتاتىن قۋىرشاقتاردىڭ (قۋىرشاقتان بولەك، سويلەيتىن مىسىقتار) كوپ شىعىپ جاتقانىن ەسكەرىپ، بالاڭىزعا سونداي تۇرلەرىن الىپ بەرىڭىز. مۇنداي ويىنشىقپەن ويناعان ەركەڭىزدىڭ ءتىلى تەز شىعىپ، ءان ايتىپ، بيلەپ وسپەك. باعالارى 2500-8000 تەڭگە ارالىعىندا.

 دىبىس شىعاراتىن ويىنشىقتار

 سويلەيتىن، اۋەنى بار، قانداي دا ءبىر دىبىس شىعاراتىن ويىنشىقتار بالالاردىڭ كوڭىلىن بىردەن اۋلايدى. ال ەگەر ولار قانداي دا ءبىر اڭ- قۇستىڭ دىبىسىن شىعارسا، ءتىپتى جاقسى. مىسالى، سيىر موڭىرەيدى نەمەسە بۇلبۇل سايرايدى. مۇنداي ويىنشىقتارمەن بالالار نەنىڭ نەندەي دىبىس شىعاراتىنىن جانە اڭ- قۇستىڭ ءتۇر- ءتۇسىن دا اجىراتۋدى ۇيرەنەدى. باعالارى 500-5000 تىڭگە ارالىعىندا.

 جانۋارلار، قۇستار

 نەنىڭ نە ەكەنىن تانىپ بىلۋدە مۇنداي ويىنشىقتاردىڭ ماڭىزى زور. جان- جانۋار، اڭ- قۇس، ءتورت تۇلىك، تولدەرىمەن بولسا، ءتىپتى جاقسى. باعالارى 100-5000 تەڭگە ارالىعىندا.

ءتۇرلى- ءتۇستى دوپتار

بالاڭىزدىڭ قاۋىپسىزدىگى ءۇشىن دوپتاردىڭ وتە ۇساقتارىن الماعانىڭىز ءجون. ءتۇرلى- ءتۇستى دوپتارمەن بالالارعا تۇستەردى اجىراتۋدى ۇيرەتىڭىز. بەلگىلى ءبىر شەڭبەرگە لاقتىرتىپ، تەپكىزىپ، دوپتارمەن ءتۇرلى ويىندار ۇيىمداستىرۋعا بولادى. باعالارى ءارقالاي.

جۇمساق ويىنشىقتار

بۇلاردىڭ ءتۇرى كوپ. اسىرەسە، قىزدار جاقسى كورەتىن بۇل جۇمساق ويىنشىقتار بالالار ءۇشىن، ەڭ الدىمەن، قاۋىپسىز بولىپ سانالادى. قۋىرشاقتاردىكىندەي قول- اياعى بولەك الىنىپ قالمايدى، كىر بولسا، جۋا سالاسىز. باعالارى ءارقالاي.

Massaget.kz


باستى سوزدەر:
:ءبولىسۋ
سونداي-اق... وقىڭىز
ونلاين قىزمەتكەرلەر
مۇراعات