پرەزيدەنت قازاقستان ماشينا جاساۋشىلارىنىڭ VIII فورۋمىنىڭ قاتىسۋشىلارىنا قۇتتىقتاۋ حات جولدادى
«قازاقستاننىڭ ماشينا جاساۋشىلار وداعى» زاڭدى تۇلعالار بىرلەستىگى باسقارماسىنىڭ ءتوراعاسى مەيرام پىشەمبايەۆ وقىپ بەردى، دەپ حابارلايدى قازاقپارات ءتىلشىسى.
«قۇرمەتتى فورۋم قاتىسۋشىلارى! سىزدەردى قازاقستان ماشينا جاساۋشىلارىنىڭ VIII فورۋمىنىڭ اشىلۋىمەن قۇتتىقتايمىن. فورۋم مەملەكەت پەن بيزنەستىڭ جۇيەلى ديالوگى، ماشينا جاساۋ سالاسىنىڭ وزەكتى ماسەلەلەرىن شەشۋ ءۇشىن سۇحبات الاڭىنا اينالدى. بيىل شارالاردىڭ باسىم بولىگى ونلاين رەجيمدە ءوتىپ جاتىر. بۇل فورۋم دا سولاي وتۋدە جانە ونىڭ اياسىندا 1- حالىقارالىق ماشينا جاساۋ جانە مەتال وڭدەۋ ونلاين- كورمەسى اشىلعان. پاندەميامەن بايلانىستى كۇردەلى ەكونوميكالىق كەزەڭگە قاراماستان وتاندىق ماشينا جاساۋ وسى جىلى 14 پايىزدىق جاقسى ءوسىم قارقىنىن كورسەتىپ وتىر. وسى كورسەتكىش بويىنشا ماشينا جاساۋ ەلدىڭ بۇكىل وڭدەۋ سەكتورىندا كوشباسشى ورىنعا شىقتى. مەنىڭ جولداۋىمدا ناعىز ءارتاراپتاندىرىلعان، تەحنولوگيالىق دامىعان ەكونوميكانى قۇرۋ، وڭدەۋ ونەركاسىبى ءوندىرىسىنىڭ كولەمىن 1,5 ەسە ارتتىرۋ تاپسىرمالارى جۇكتەلدى»، - دەپ اتاپ وتەدى ق ر پرەزيدەنتى قۇتتىقتاۋىندا.
قاسىم-جومارت توقايەۆتىڭ اتاپ وتۋىنشە، مەملەكەت بۇل ءۇشىن وتاندىق وندىرۋشىلەردى قولداۋ تەتىكتەرىن جەتىلدىرىپ، ونەركاسىپتىك ساياسات تۋرالى زاڭ قابىلداناتىن بولادى.
«جاڭا جاعدايداعى قازاقستان ماشينا جاساۋ سالاسى ءوزىنىڭ قارقىندى دامۋىن جالعاستىراتىندىعىنا سەنىمدىمىن. سالانىڭ ءوندىرىستى كەڭەيتۋگە جانە ەكسپورتتى ارتتىرۋعا ايتارلىقتاي الەۋەتى بار. بارلىقتارىڭىزعا جەمىستى جۇمىس جانە العا قويىلعان ماقساتتارعا قول جەتكىزۋدى تىلەيمىن!»، - دەدى مەملەكەت باسشىسى.