داۋلەت تۇرلىحانوۆ UWW Asia پرەزيدەنتى قىزمەتىنە قايتا سايلاندى
الماتىدا وتكەن ازيا كۇرەس كەڭەسىنىڭ باس اسسامبلەياسىندا قاتىسۋشىلاردىڭ ءبىراۋىزدى داۋىسىنا يە بولدى.
اسسامبلەياعا بىرىككەن كۇرەس الەمىنىڭ پرەزيدەنتى، ح و ك اتقارۋ كوميتەتىنىڭ مۇشەسى نەناد لالوۆيچ (سەربيا)، UWW ۆيتسە-پرەزيدەنتتەرى ميحايل مامياشۆيلي (رەسەي) جانە احرولجان رۋزيەۆ (وزبەكستان)، سونداي-اق UWW مۇشەسى قاتىستى. داۋلەت تۇرلىحانوۆ ءتورتجىلدىق مەرزىمگە قايتا سايلاندى.
ايتا كەتەيىك، قازاقستاندىق مامان العاش رەت بۇل قىزمەتكە 2017-جىلدىڭ مامىر ايىندا نيۋ-دەليدە وتكەن كونگرەستە سايلانعان بولاتىن.
داۋلەت بولات ۇلى تۇرلىحانوۆ 1963-جىلى 18- قاراشادا شىعىس قازاقستان وبلىسىنىڭ جارما اۋدانىندا دۇنيەگە كەلگەن. گرەك-ريم كۇرەسىنەن ەڭبەك سىڭىرگەن سپورت شەبەرى، قازاقستاننىڭ ەڭبەك سىڭىرگەن قايراتكەرى، قازاقستان جانە قىرعىزستان رەسپۋبليكالارىنىڭ ەڭبەك سىڭىرگەن جاتتىقتىرۋشىسى. وليمپيادا ويىندارىنىڭ كۇمىس (1988 ج) جانە قولا (1992 ج) جۇلدەگەرى. الەم چەمپيونى، ەۋروپا جانە ازيا چەمپيوناتتارىندا توپ جارعان. ك س ر و چەمپيوناتىن جەتى رەت قاتارىنان جەڭىپ العان جالعىز بالۋان.
massaget.kz