ب ۇ ۇ، USAID جانە The Asia Foundation حالىقارالىق ۇيىمداردا قىزمەت اتقارعان قازاق قىزى - شەتەلدەگى قازاق ءتىلدى ب ا ق- قا شولۋ

نۇر-سۇلتان. قازاقپارات - «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

تۇرىك دارىگەرلەر تاجىريبەلەرىن قازاق ارىپتەستەرىمەن ءبولىستى - TRT

بۇل تۋرالى تۇركيا راديو تەلەۆيزيا پورتالى جازدى. تۇرىك دارىگەرلەر تاجىريبەلەرىن قازاق ارىپتەستەرىمەن ءبولىستى. تۇرىكستاندا وتكەن سيمپوزيۋمعا قاتىسقان دارىگەرلەر بالالاردا تۋا بىتكەن اۋرۋلار جانە ومىراۋ قاتەرلى ىسىگىنىڭ حيرۋرگيالىق ەمى تاقىرىپتارىن تالقىلادى، دەپ جازدى TRT. اتالعان ب ا ق- تىڭ كەلتىرگەن دەرەگىنشە، سيمپوزيۋمعا قاتىسقان تۇرىك دارىگەرلەر ءوز تاجىريبەلەرىمەن بولىسكەن. شارادا بالالاردىڭ تۋا بىتكەن اۋرۋلارى مەن ومىراۋ قاتەرلى ىسىگىنىڭ حيرۋرگيالىق ەمى قاراستىرىلعان. سيمپوزيۋمعا تۇركيانىڭ بەدەلدى كلينيكالارىنىڭ دارىگەرلەرى شاقىرىلدى.

«ءوز تاجىريبەسىن بايانداپ بەرگەن پروفەسسور سەلامي ءسوزىبىر پاندەميا جاعدايىندا وسىنداي جينالىستار ۇيىمداستىرۋدىڭ دارىگەرلەر ءۇشىن ۇلكەن مۇمكىندىك ەكەنىن ايتتى. ايىرىقشا قازاق ارىپتەستەرىمەن ىنتىماقتاستىقتى ودان ءارى نىعايتۋ ماقساتىمەن بىرىگىپ جۇمىستانۋدىڭ جالعاساتىنىن ءبىلدىردى»، دەپ جازادى TRT.

ايتا كەتەيىك، شاراعا تۇركىستان وبلىسىنىڭ ءتۇرلى اۋداندارىنىڭ دارىگەرلەرى قاتىستى. وبلىستا 23 مىڭ 429 مەديتسينا قىزمەتكەرى جۇمىس ىستەيدى. ولاردىڭ بەس مىڭنان استامى دارىگەرلەر.

قازاقستان ءوزى وندىرگەن ۆاكسينانى ەگۋدى باستادى - «جەنمين جيباو» (People Daily)

وسى اپتادا قىتايدىڭ «جەنمين جيباو» اقپاراتتىق پورتالى قازاقستان تۋرالى ءتورت اقپارات جاريالادى.

سونىڭ ءبىرى قازاقستاننىڭ كوروناۆيرۋسقا قارسى ءوزى وندىرگەن QazVac ۆاكسيناسى تۋرالى شاعىن ماقالا. ايتا كەتۋ كەرەك، كۇللى ادامزات دەنساۋلىعىنا قاتەر ءتوندىرىپ تۇرعان بۇگىنگىدەي اسا قاۋىپتى ىندەتكە قارسى قازاقستان عالىمدارىنىڭ جاساعان ۆاكسيناسى قىتاي ەلىنىڭ دە نازارىن اۋدارتقان. قازاقستاننىڭ دەنساۋلىق ساقتاۋ ءمينيسترى الەكسەي سوي العاشقىلاردىڭ ءبىرى بولىپ كوروناۆيرۋسقا قارسى قازاقستاندىق QazVac ۆاكسيناسىن سالدىردى.

وسىلايشا قازاقستاندا بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ بازاسىندا شىعارىلعان QazCovid-in ۆاكسيناسىن سالدىرۋ باستالدى، دەپ جازادى قىتايلىق ب ا ق.

«26-ءساۋىر كۇنى قازاقستاندا QazVac-تى ەگۋ جۇمىسىن باستادى. قازاقستاننىڭ دەنساۋلىق ساقتاۋ ءمينيسترى الەكسەي سوي، ۆيتسە-مينيستر مارات شورانوۆ ءبىرىنشى بولىپ قازاقستاندىق ۆاكسينانى ەكتىردى. قازىرگە دەيىن، قازاقستاندا بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتىنىڭ بازاسىندا وندىرىلگەن 50 مىڭ دانا ۆاكسينا وبلىستارعا جەتكىزىلدى. كەلەسى قادامدا 25 مىڭ ادامعا ۆاكسينا ەگۋ جوسپارلانۋدا. مۇنىڭ ىشىندە نۇر- سۇلتان قالاسى مەن الماتى قالاسىنىڭ ءارقايسىسىنا 6000 ۆاكسينا ءبولىندى. شىمكەنت قالاسى، قاراعاندى، شىعىس قازاقستان، الماتى وبلىستارىنىڭ ءارقايسىسىنا 4000 دانا ۆاكسينادان، باسقا ايماقتارعادا 2000 دانادان ءبولىندى. ۆاكسينامەن قامتاماسىز ەتۋدى كەڭەيتۋ ءۇشىن، قازاقستان ۇكىمەتى جامبىل وبلىسىندا جاڭادان بيولوگيالىق ءدارى جاساۋ زاۋىتىن سالدى»، دەپ جازدى قىتايدىڭ «جەنمين جيباو» اقپاراتتىق پورتالى.

قازاق قىزىنىڭ شەتەلدە ءبىلىم الۋ جانە حالىقارالىق ۇيىمداردا قىزمەتى تۋرالى - Kaznews

موڭعوليالىق Kaznews اقپاراتتىق پورتالىندا جاس ءوسپىرىم شاعىندا-اق ج و و تابالدىرىعىن اتتاعان، ەسەيە كەلە شەتەل اسىپ، ءبىلىمىن، ىسىكەرلىگىن شىڭداعان قازاق قىزى تۋرالى ماقالا جارىق كوردى.

«ۋنيۆەرسيتەت تابالدىرىعىن 15 جاسىندا اتتاپ، 19 جاسىندا شەتەلدىك جوعارعى وقۋ ورىندارىنا ماگيسترانتۋراعا تۇسكەن داۋرەنگۇل عالىمبەك قىزى جايلى بىلەمىز بە؟» دەپ باستالادى اتالعان جازبا.

داۋرەنگۇل عالىمبەك قىزى 1982 -جىلى موڭعوليانىڭ حەنتي ايماعىندا تۋعان. حەنتي ايماعىنىڭ جالپى ءبىلىم بەرەتىن ورتا مەكتەبىنىڭ تۇلەگى. اۋىل شارۋاشىلىق ۋنيۆەرسيتەتىن اگرو-ەكونوميكا ماماندىعى مەن موڭعوليا ۇلتتىق ۋنيۆەرسيتەتىن زاڭگەر ماماندىعىمەن ءتامامداعان. گەرمانيانىڭ فرايسينگ قالاسىندا ورنالاسقان ۆاينشتەفان ۋنيۆەرسيتەتىنەن ىسكەرلىك باسقارۋ ماگيسترى (م ۆ ا) دارەجەسىن العان. JICA، UNDP، UNFPA، USAID جانە The Asia Foundation حالىقارالىق ۇيىمداردا قىزمەت اتقارعان.

بۇل جولعى جازبادا داۋرەنگۇل عالىمبەك قىزىنىڭ ءوزى جانە وتباسى تۋرالى، ماماندىق تاڭداۋ جانە شەتەلگە وقۋ گرانتتارى جونىندە كەڭىنەن توقتالىپ وتكەن. سونىمەن قاتار د. عالىمبەك قىزى ءوزى بارىپ وقۋ وقىعان گەرمانياداعى نەمىس حالقىنان ۇيرەنگەن ۇلگى- ونەگە، ولاردىڭ پايداسى جايىندا سىر شەرتەدى. ماقالا سوڭىندا ول جۇمىسقا ورنالاسۋى جايىندا، سونداي- اق قازىرگى قىزمەتى جايلى دا ويلارىمەن بولىسكەن.

قازاق پەن يران عالىمدارى بىرلەسىپ قولجازباردى قالپىنا كەلتىرمەك - Parstoday

قازاقستاننىڭ «عىلىم ورداسى» ر م ك يراننان ءوزىنىڭ قولجازبا نۇسقالارىن قالپىنا كەلتىرۋگە كومەكتەسۋدى سۇرادى، دەپ حابارلايدى رarstoday. اتالعان ب ا ق- تىڭ كەلتىرگەن دەرەگىنە سۇيەنسەك، يراننىڭ الماتىداعى باس كونسۋلى موحسەن فوعاني مەن ق ر ءبىلىم جانە عىلىم مينيسترلىگى عىلىم كوميتەتىنىڭ «عىلىم ورداسى» ر م ك باس ديرەكتورى لەيلا ابۋباكىروۆامەن كەزدەسۋىندە ەكى ەلدىڭ عىلىم مەن مادەنيەت سالاسىندا ارىپتەستىكتى دامىتۋى تۋرالى كەلىسىمدەرگە قول جەتكىزدى.

ابۋباكىروۆانىڭ ايتۋىنشا، قازاقستاندا 100 مىڭنان اسا قولجازبا كىتاپ بار، ولاردىڭ شامامەن 30 مىڭى شىعىس تىلدەرىندە، سونىڭ ىشىندە پارسى، اراب، قىتاي جانە تۇركى تىلدەرىندە جازىلعان.

«ول (لەيلا ابۋباكىروۆا - اۆتور) پارسى تىلىندە جۇزدەگەن قولجازبا مەن توتە جازۋمەن جازىلعان قازاق، ورىس جانە ۇيعىر تىلىندەگى كىتاپتاردىڭ بارىنا توقتالىپ، يراننان وسى كىتاپتاردى قالپىنا كەلتىرىپ، نۇسقالاردى وقۋعا كومەكتەسۋدى سۇرادى. كەزدەسۋدىڭ سوڭىندا فوعاني وسى ورتالىقتاعى پارسى، تۇركى، قازاق جانە ورىس تىلدەرىندەگى قولجازبالار مۇراجايى مەن پارسى تىلىندەگى نۇسقالار قورىن تاماشالادى»، دەپ جازدى يراننىڭ Parstoday اقپارات اگەنتتىگى.

اۆتور: بەيسەن سۇلتان ۇلى