قازاقستانداعى ەكى جاڭا قورىق UNESCO تىزىمىنە قوسىلۋى مۇمكىن
ەكولوگيا، گەولوگيا جانە تابيعي رەسۋرستار مينيسترلىگى باسپا ءسوز قىزمەتىنىڭ مالىمەتىنشە، UNESCO- نىڭ «ادام جانە بيوسفەرا» باعدارلاماسىنىڭ (م ا ۆ) حالىقارالىق ۇيلەستىرۋ كەڭەسىنىڭ 32- سەسسياسىنىڭ وتىرىسى 2020 -جىلدىڭ 27 - جانە 28 - قازانىندا ۆيرتۋالدى فورماتتا ءوتتى. كەزدەسۋدى وتكىزۋدىڭ تاڭدالعان فورماتى COVID-19 پاندەمياسىنا بايلانىستى جانە كەزدەسۋگە قاتىسۋشىلاردىڭ قاۋىپسىزدىگىن قامتاماسىز ەتۋ ماقساتىندا ءتۇرلى ەلدەردەن تاڭدالدى. سەسسياعا قازاقستان اتىنان UNESCO- نىڭ «ادام جانە بيوسفەرا» باعدارلاماسىنىڭ قازاقستاندىق ۇلتتىق كوميتەتىنىڭ (م ا ۆ) مۇشەلەرى رومان ياشەنكو مەن ۆيكتوريا يلينا، سونداي- اق قازاقستان رەسپۋبليكاسىنىڭ فرانسۋز رەسپۋبليكاسىنداعى ەلشىلىگىنىڭ قىزمەتكەرى ءاليا بايسابايەۆا قاتىستى.
«اتالمىش باعدارلامانىڭ قازاقستاندىق ۇلتتىق كوميتەتى كارانتين رەجيمىنە بايلانىستى بارلىق قيىندىققا قاراماستان، UNESCO- نىڭ دۇنيەجۇزىلىك بيوسفەرالىق رەزەرۆاتتار جەلىسىنە قوسۋ ءۇشىن 2 نوميناتسيالىق دەرەكناما دايىندادى. كوميتەت مۇشەلەرى الماتى جانە باتىس التاي مەملەكەتتىك تابيعي قورىقتارى اكىمشىلىگى قىزمەتكەرلەرىنىڭ ۇيلەسىمدى جۇمىسىنىڭ ارقاسىندا قازاقستانداعى UNESCO- نىڭ «ادام جانە بيوسفەرا» باعدارلاماسىنىڭ بيوسفەرالىق رەزەرۆاتتارىنىڭ ۇلتتىق جەلىسى ەكى جاڭا بيوسفەرالىق رەزەرۆاتپەن تولىقتىرىلدى»، دەلىنگەن حابارلامادا.
حالىقارالىق دەڭگەيدە ارنايى ساراپتامالىق كەڭەس قازاقستاندىق كوميتەت ۇسىنعان قۇجاتتامانىڭ «ادام جانە بيوسفەرا» باعدارلاماسىنىڭ تالاپتارىنا سايكەستىگىنە باعا بەرىپ، UNESCO- نىڭ دۇنيەجۇزىلىك بيوسفەرالىق رەزەرۆاتتار جەلىسىنىڭ بيوسفەرالىق رەزەرۆاتتارى رەتىندە الماتى جانە باتىس التاي مەملەكەتتىك تابيعي قورىقتارىن ماقۇلداۋ مۇمكىندىگى تۋرالى شەشىم قابىلدادى.
«بۇگىنگى تاڭدا UNESCO- نىڭ «ادام جانە بيوسفەرا» باعدارلاماسىنىڭ بيوسفەرالىق رەزەرۆاتتارىنىڭ قازاقستانداعى ۇلتتىق جەلىسىندە 12 رەزەرۆات تىركەلگەن. بۇل ورتالىق ازيانىڭ باسقا ەلدەرىندەگى بيوسفەرالىق رەزەرۆاتتار سانىنان ەداۋىر اسىپ تۇسەدى. وسىنشاما بيوسفەرالىق رەزەرۆاتتىڭ تانىلۋى قازاقستاننىڭ بيولوگيالىق ارتۇرلىلىگىن ساقتاۋ ماسەلەلەرىنە الەمدىك قوعامداستىقتىڭ نازارىن اۋداراتىنىن جانە ونى بولاشاق ۇرپاق ءۇشىن ساقتاۋعا ۇمتىلاتىنىن ايعاقتايدى»، دەلىنگەن حابارلامادا.
دۇنيەجۇزىلىك بيوسفەرالىق رەزەرۆاتتار جەلىسىنە ءارتۇرلى ەلدەردىڭ اۋماعىندا ورنالاسقان 24 بيوسفەرالىق رەزەرۆات قوسىلدى. سونىڭ ءبىرى ترانسشەكارالىق قورىق. ءقازىر دۇنيەجۇزىلىك رەزەرۆاتتار جەلىسىنە الەمنىڭ 129 ەلىنىڭ اۋماعىندا ورنالاسقان 714 رەزەرۆات كىرەدى. UNESCO باعدارلاماسى بويىنشا جۇمىس ىستەيتىن ۇلتتىق كوميتەتتىڭ قىزمەتى تۋرالى تولىعىراق مەكەمەنىڭ سايتىنان بىلۋگە بولادى.