UBT nátıjesin Telegram arqyly bilýge bolady
«UBT nátıjelerin alý úrdisi únemi jetildirilip otyrady. Buryn testileý nátıjeleri arnaıy taqtashalarǵa ilingen bolsa, búgingi tańda QR BǴM-niń basqa da qosymsha múmkindikteri bar. UBT-2018 nátıjelerin endi Telegram-bot @edu.gov.kz nemese edu.mail.kz saıty arqyly úıden shyqpaı-aq bilýge bolady: ol úshin testileýge qatysatyn árbir talapkerge beriletin TJK (test tapsyrýshynyń jeke kodyn) engizý qajet», - dep málimdedi mınıstrliktiń baspasóz qyzmeti.
Sondaı-aq, testileý qorytyndylaryn Ulttyq testileý ortalyǵynyń saıtynan da bilýge bolady. Bul oraıda testileý nátıjelerin TJK arqyly árbir talapker ózi ǵana kóre alady. Joǵaryda kórsetilgen resýrstarǵa UBT nátıjeleri aqparattyń óńdelýine baılanysty jarıalanyp otyrady.
Eske sala ketsek, búgin mektep qabyrǵasynan túlep ushqan túlekterdiń alǵashqy legi Ulttyq biryńǵaı testileýden ótip jatyr.
Bıyl respýblıka boıynsha mektep bitirýshilerdiń 70%, ıaǵnı 102 myńy UBT tapsyrady. Astanada 6 myńǵa jýyq túlektiń 90% testileýden ótedi. Mektep bitirgen 147 myń túlektiń basym bóligi UBT-ny qazaq tilinde tapsyrady.
UBT-da jalpy 80 myń suraq bolady. 2018 jylǵa arnalǵan Ulttyq biryńǵaı testi suraqtary 50 paıyzǵa jańartylyp otyr.
Qazaqstandyq mektep bitirýshilerge Ulttyq biryńǵaı testileýden ótýge eki ret múmkindik beriledi. Ekeýinde de qajetti ball jınaı almaǵan balalar JOO-ǵa shartty túrde qabyldanady.