Shymkentte osy aptadan jańa basqarmalar qurylady
Qala ákiminiń sózine qaraǵanda, osy aptadan bastap qalanyń jańa basqarmalary qurylyp, qala ákiminiń orynbasarlary taǵaıyndalady.
«Aldymyzda úlken mindetter tur. Biz de Astana, Almaty qalasymen barlyq jaǵynan sáıkes bolýymyz kerek. Astana qalasynyń ákimdigimen memorandýmǵa qol qoıýdy josparlap otyrmyz. Bizdiń qyzmetkerler elordalyq áriptesterimen sáýlet, jol salý, aýlalardy abattandyrý máseleleri boıynsha tájirıbe almasyp qaıtady. Negizinen, bizde resýrs bar. Tek qana jumys isteý qajet. Elbasynyń tapsyrmasyn oryndaýǵa barlyq kúsh-jigerimizdi salamyz», - dedi qala ákimi.
Sondaı-aq, jıynda shahardyń ótken 2017 jylǵy bıýdjetiniń atqarylýy týraly qala ákiminiń orynbasary Qaırat Nurtaıdyń esebi tyńdaldy. Onyń málimdeýinshe, jyl qorytyndysymen ózindik kirister jospary 104,7 paıyzǵa artyǵymen oryndalǵan. Shyǵystar bóliginiń naqtylanǵan jospary da 99,9 paıyzǵa teń. Máslıhat otyrysynda budan ózge qalalyq bilim, sáýlet jáne qala qurylysy, jer qatynastary bólimi basshylary men tórt aýdan ákimdiginiń jumysy tyńdaldy. Qaladaǵy aýyzsý, elektr, tabıǵı gazben qamtamasyz etý, káriz júıeleri, jylý júıelerindegi negizgi jumystardyń atqarylý barysy sóz boldy.