Qyzylordada sharýa qojalyǵy shóldi aımaqta baq ósirip otyr

None
None
QYZYLORDA. QazAqparat - Qyzylorda oblysy Jalaǵash aýdanyna qarasty Tań aýylyndaǵy «Manaq baba» sharýa qojalyǵy jasyl tehnologıa ıgiligi arqyly sortań jerdi jaıqalǵan jasyl jelekke aınaldyryp otyr, dep habarlaıdy QazAqparat tilshisi.

Atalmysh joba boıynsha sharýa qojalyǵyna qarasty 8 gektar alqap qalpyna keltirildi. Qazirgi tańda onda 3 gektar alma baǵy jáne qalǵan bóliginde kókónis daqyldary egilgen. Munda kún sáýlesi men jel energıasynan qýat alynady. Atalmysh qos qurylǵy shól dalany oazıske aınaldyryp otyrǵan sharýa qojalyǵynyń ıgiligine jarap tur. Bul joba Birikken Ulttar Uıymynyń qoldaýymen qolǵa alynǵan.

Aıta keterligi, egistik alqabynda tamshylatyp sýarý ádisi qoldanylady. Balamaly energıa tereńdigi 330 metrlik uńǵymadan sý shyǵarý úshin qoldanylady. Shyǵarylǵan sý 90 metrlik basseınge jınalyp, sonda arnaıy qurylǵy arqyly tazartylady. Sodan keıin sharýashylyq ıgiligine aınalady. Egin de sý ishedi, malǵa da sý beriledi. Aýyz sý qajettiligine de jarap tur.

«Biz munda 3 gektar alqapqa alma baǵyn ósirip otyrmyz. Almanyń kóptegen sorttary bar. Polshadan alyp kelgen alma da bar. О́nimdiligi joǵary. Gektaryna 3 tonnaǵa deıin ónim jınaımyz. Sondaı-aq, almanyń jartylaı ergejeıli degen túrinen aldaǵy jyly ónim alamyz degen jospar bar», - deıdi «Manaq baba» sharýa qojalyǵynyń tóraǵasy Sáken Shaǵyrtaev.

Sharýa qojalyǵy tóraǵasynyń aıtýynsha, kún men jel energıasynan 40 KVt energıa alynady. Kún kózi az túskende, dızeldi generatordy iske qosyp, sol arqyly qýat alynady.

Sharýa qojalyǵy osylaısha jańa tehnologıanyń zor ıgiligin kórip otyr. Sol arqyly sý men energıaǵa jumsalatyn shyǵyn 29 mln teńgege deıin únemdeledi. Taǵy bir aıta keterligi, aýaǵa bólinetin zıandy zat mólsheri jylyna 300 myń tonnaǵa deıin kemidi.

سوڭعى جاڭالىقتار