Qoıandy men Qosshy halqy Astanadaǵy emhanalarǵa tirkele ala ma
«2018 jyldyń 15 qyrkúıeginen emhanany óz erkimen tirkelý naýqany bastaldy. Bul shara 15 qarashaǵa deıin jalǵasady. Emhanaǵa qalaı tirkelýge bolady? Eger biletin bolsańyzdar, emhanany óz erkimen tańdaý ol memlekettik kórsetiletin qyzmetterdiń tizimine enedi. Memlekettik qyzmetter bekitilgen reglamentter men standarttar arqyly usynylady. Osy bekitilgen reglamentter men standarttarǵa sáıkes bul qyzmetti emhanaǵa birinshiden, tikeleı tirkeý arqyly, ıaǵnı ótinish bildirý arqyly, ekinshiden, úıden shyqpaı elektrondy túrde egov portaly arqyly, úshinshiden, Halyqqa qyzmet kórsetý ortalyqtaryndaǵy keńesshilerge júgine otyryp, elektrondy qosymsha arqyly alýǵa bolady», - deıdi Astana qalalyq densaýlyq saqtaý basqarmasy ákimshilik-quqyqtyq bóliminiń bas mamany Baǵym Bıbolova.
Baspasóz máslıhatyna kelgen basqarma mamandaryna «Elordanyń irgesindegi Qosshy men Qoıandy aýyldarynyń halqy Astana qalasyndaǵy emhanalarǵa tirkele ala ma?» degen saýal qoıyldy.
«Buıryqqa sáıkes, qala turǵyndarynyń jergilikti turǵynjaı, jumys orny men turǵylyqty mekenjaıy boıynsha emhanany tańdaý quqyǵy bar. Al Aqmola oblysynyń (Qoıandy men Qosshy qaraıtyn) halqy ákimshiliktik-aýmaqtyq mekenjaı boıynsha óz óńirindegi emhanalarǵa ǵana tirkele alady. Aıta keterligi, buıryqqa sáıkes, Astana qalasynyń turǵyndary jylyna bir ret qana eki aı ishinde erkin tańdaý quqyǵy arqyly emhanaǵa tirkeledi», - dedi bul suraqqa Qoǵamdyq densaýlyq saqtaý basqarmasynyń Biryńǵaı medısınalyq-sanıtarlyq bóliminiń bas mamany Janna Esqalıeva.
Qoǵamdyq densaýlyq saqtaý mamandarynyń túsindirýinshe, Aqmola oblysynyń turǵyndary (Astana irgesindegi aýyldardaǵy) jergilikti emhanalarda jekelegen medısınalyq mamandar bolmaǵan jaǵdaıda normatıvti qujattarǵa sáıkes oblys ortalyǵy - Kókshetaýǵa baryp emdeledi.