21:15, 21 - شىلدە 2021 | GMT +6
ەرالى توعجانوۆ QazVac ۆاكسيناسىن دۇنيەجۇزىلىك دەنساۋلىق ساقتاۋ ۇيىمىندا تىركەۋ بويىنشا تاپسىرما بەردى
نۇر-سۇلتان. قازاقپارات - جاۋاپتى سالا باسشىلارى وتاندىق QazVac ۆاكسيناسىن دۇنيەجۇزىلىك دەنساۋلىق ساقتاۋ ۇيىمىندا تىركەۋ ماسەلەسىن قىسقا مەرزىمدە پىسىقتاۋعا مىندەتتەلدى، دەپ حابارلايدى قازاقپارات ءتىلشىسى.
بۇل تۋرالى بۇگىن ق ر پرەمەر-ءمينيسترىنىڭ ورىنباسارى ەرالى توعجانوۆتىڭ توراعالىعىمەن ەل اۋماعىندا كوروناۆيرۋستىق ينفەكتسيانىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ وتىرىسىندا ايتىلدى.
وتىرىس بارىسىندا ۆيتسە-پرەمەر مەملەكەت باسشىسىنىڭ تاپسىرمالارىن ورىنداۋ بويىنشا قىسقا مەرزىمدە شارالار قابىلداۋدى، اتاپ ايتقاندا، دۇنيەجۇزىلىك دەنساۋلىق ساقتاۋ ۇيىمىندا QazVac وتاندىق ۆاكسيناسىن تىركەۋ جانە ونى ودان ءارى ءۇشىنشى ەلدەردىڭ نارىقتارىنا ىلگەرىلتۋ ماسەلەسىن پىسىقتاۋدى، وسى باعىتتا جول كارتاسىن ازىرلەۋدى تاپسىردى.
ەسكە سالساق، ەپيداحۋال جونىندەگى كەڭەستىڭ وتىرىسىندا پرەزيدەنت قاسىم-جومارت ۇكىمەتكە QazVac-تى ەكسپورتتاۋ ماسەلەسىن پىسىقتاۋدى تاپسىرعان بولاتىن.