Qazaqstanda «7-20-25» baǵdarlamasy bastaldy
«Búginnen bastap baǵdarlama iske asa bastaıdy. Ekinshi deńgeıli banktermen kelisimderge qol qoıyldy. Almaty, Astana, Atyraý, Oral qalalarynda alǵashqy ıpotekalyq qaryzdar berilýde», - dedi Danıar Aqyshev.
Onyń aıtýynsha, jańa baǵdarlama qazaqstandyqtar tarapynan baspanaǵa suranysty arttyryp, qurylysqa tyń serpin bermek.
Aıta ketsek, QR Ulttyq banki tóraǵasy atalǵan baǵdarlamanyń operatory «Baspana» ıpotekalyq uıymy bolatynyn 5 mamyrda aıtqan edi.
Ulttyq bank bekitken baǵdarlama boıynsha ıpotekalyq qaryzdar 7% jyldyq mólsherlememen 25 jylǵa beriledi. Kelesi sharttarynyń biri - alǵashqy salym 20% bolmaq. Jańa ıpotekalyq zaımdardy kez kelgen QR azamaty ala alady. Ol úshin eń basty shart - adamnyń basynda jyljymaıtyn múlki bolmaýy kerek. Baǵdarlama boıynsha Qazaqstannyń kez kelgen óńirinen Almaty, Astana, Atyraý qalalarynan eń maksımaldy 25 mln teńgege, qalǵan óńirlerde 15 mln teńgege baspana satyp alýǵa bolady.