Qazaqstan altyn qory boıynsha álemde 15-orynda tur
QR Ulttyq banki taratqan aqparat boıynsha, 2018 jyldyń basynan beri altynnyń álemdik bırjalardaǵy baǵa belgilenimi shamamen 8%-ǵa tómendedi. AQSH FRJ mólsherlemeleriniń ósýi jáne AQSH ekonomıkasy boıynsha oń derekterdiń shyǵýy nátıjesinde AQSH dollary nyǵaıǵany belgili. Bul jaǵdaı altyn baǵasynyń tómendeýine negiz boldy.
«Alaıda, birqatar elderge qarsy ekonomıkalyq sanksıalardan jáne saýda shekteýlerinen týyndaǵan kúrdeli geosaıası jaǵdaı naryqtardy qubyltyp, ınvestorlardyń neǵurlym qaýipsiz aktıv izdestirýine yqpal etedi. Ekonomıkalyq jáne saıası turaqsyzdyq jaǵdaıynda valıýta naryǵy da, baǵaly qaǵazdar naryǵy da qubylmaly bolady, mine, sodan qorǵanysh retinde altyn men baǵaly metaldardyń róli artady. Ortalyq bankter altynynyń qorlary uzaq merzimdi perspektıvada saqtalý, ótimdi bolý jáne kiristi bolý sıpattary bar saqtandyrý aktıvteri retinde bolady» delingen habarlamada.
Álemdik ortalyq bankterdiń altynnyń naqty kólemin arttyrýdy tezdetý prosesi daǵdarystan keıingi 2009 jyly bastaldy. Sońǵy 5 jylda altynmen jınaqtalǵan rezervter kóptegen damýshy elderde baıqalady. Osy kezeńde altyndy neǵurlym belsendi satyp alýshylar Reseı, Túrkıa, Qytaı jáne Qazaqstan ortalyq bankteri boldy.