نۇرسۇلتاندا Qazaqstan تەلەارناسى تۇسىرگەن 6 تاريحي سەريالدىڭ تانىستىرىلىمى ءوتتى
تاۋەلسىزدىكتىڭ 30 جىلدىعى قارساڭىندا Qazaqstan تەلەارناسى كينوسۇيەر قاۋىمعا ەرەكشە سىي جاساماق.
سونىڭ اياسىندا «جاڭگىر حان. ساراي سىرى»، «احمەت. ۇلت ۇستازى»، «دومالاق انا»، «تاشەنيەۆ. تايتالاس»، «قانىش. قازىنا»، «مۇقاعالي. بۇل عاسىردان ەمەسپىن» تاريحي تەلەحيكايالارىنىڭ تانىستىرىلىمى ءوتتى.
ايتۋلى شاراعا ق ر پرەمەر-ءمينيسترىنىڭ ورىنباسارى ەرالى توعجانوۆ، ق ر اقپارات جانە قوعامدىق دامۋ ءمينيسترى ايدا بالايەۆا، ق ر پارلامەنتى ءماجىلىسىنىڭ دەپۋتاتتارى، كينو جانە جۋرناليستيكا سالاسىنىڭ وكىلدەرى قاتىستى.
تانىستىرىلىم الدىندا ءسوز العان ۇكىمەت باسشىسىنىڭ ورىنباسارى ەرالى توعجانوۆ تاريحي سەريالداردىڭ تاۋەلسىزدىك تويىنىڭ قارساڭىندا كورەرمەنگە جول تارتقانىن ەسكە سالدى.
«تاۋەلسىزدىكتىڭ 30 جىلىندا قازاقتىڭ رۋحىنىڭ دا، نامىسىنىڭ دا، ءتىلىنىڭ دە، ءدىلىنىڭ دە وسكەنىن الەم كوردى. بۇگىن تۇساۋى كەسىلىپ وتىرعان تۋىندىلار وسى تاۋەلسىزدىكتىڭ ءبىر ۇلكەن ناتيجەسى دەپ ايتسام ارتىق ەمەس قوي دەپ ويلايمىن. سىرتتان الىنعان ەشتەڭە جوق بۇل جەردە. بۇل - ءبىزدىڭ ناقتى ءومىرىمىز. بۇل - ءبىزدىڭ ناقتى تاريحىمىز. قازاق بالاسىنىڭ باسىنان وتكەن قيىن كەزەڭدەر دە سيپاتتالعانىن وزدەرىڭىز بايقاپ وتىرسىزدار. مىسالى «تاشەنيەۆ. تايتالاس» فيلمىنىڭ استارىندا قانداي ساياسي ماسەلە جاتقانىن ءبارىڭىز جاقسى بىلەسىزدەر. ونى حالىق تا بىلەدى. ءبىراق سونى جەتكىزىپ ايتۋىمىز كەرەك. تاريحي سەريالدارعا باسىمدىق بەرىلۋى تەگىن ەمەس. XVII عاسىرداعى، XIX عاسىرداعى قازاق دالاسىنىڭ، قازاق بالاسىنىڭ باسىنا تۇسكەن كۇردەلى كەزەڭدەردە جول تاۋىپ، ەلدى العا سۇيرەگەن ازاماتتاردىڭ تۇلعاسىن اشىپ كورسەتۋ - بۇگىنگى بۋىننىڭ پارىزى»، - دەگەن ۆيتسە-پرەمەر Qazaqstan تەلەارناسىنىڭ ۇجىمى مەن ق ر اقپارات جانە قوعامدىق دامۋ مينيسترلىگىنە العىس ءبىلدىردى.
«ءبىزدىڭ اقپارات مينيسترلىگى كەرەمەت جۇمىس جاسادى دەپ ويلايمىن. تاۋەلسىزدىگىمىزدىڭ 30 جىلدىعىنىڭ الدىندا وسىنداي قۇندى دۇنيەلەردى حالىقتىڭ الدىنا شىعارىپ، ەلىمىزگە كورسەتە الساق، حالىقتىڭ جۇرەگىنە جەتە الساق، ۇلكەن جەڭىس قوي دەپ ويلايمىن. سول جولدا ۇلكەن قادام جاسالدى. ءار ءتۇرلى ويلار، پىكىرلەر بولۋى مۇمكىن. دەگەنمەن حالىقتىڭ ويى ءبىر جەردەن شىعاتىنىنا سەنەمىن. نەگە دەسەڭىزدەر، ناقتى تاريحي ساتتەرىمىزدى شامامىز كەلگەنشە ەلگە جەتكىزۋگە مىندەتتىمىز. سولاي بولاتىنىن مەنىڭ ەشقانداي كۇمانىم جوق. كورەرمەندەر دە ءوز باعاسىن بەرە جاتار»، - دەدى ەرالى توعجانوۆ.
