Qajylyqqa attanǵan qazaqstandyqtar Saýd Arabıasyna jetti
Qajylyq paryzyn óteıtin qazaqstandyqtar Saýd Arabıasyna 9-15 tamyz aralyǵynda baryp, 1 qyrkúıekke deıin elge oralady.
«Bıyl qajylyqqa nıet bildirgen qazaqstandyqtardy Saýd Arabıasyna tasymaldaý úshin «SCAT» áýe kompanıasynyń jeti reısi josparlanǵan. «Shymkent-Djıdda» baǵytyndaǵy DV 5073 reısi Boıng 737-700 ushaǵymen jergilikti ýaqyt boıynsha saǵat 06.44-te ushyp ketti. Bort ishinde 149 qazaqstandyq boldy. Ushaq Astana ýaqytymen saǵat 11:15-te Djıdda áýejaıyna qondy. Keri qaıtarda bul qajylar 27 tamyz kúni Medınadan Shymkentke ushady», - delingen Azamattyq avıasıa komıtetiniń resmı habarlamasynda.
Komıtettiń habarlaýynsha, qajylyq etýshilerdi tasymaldaý boıynsha «SCAT» áýe kompanıasynyń kelesi «Almaty-Djıdda» reısi búgin jergilikti ýaqytpen saǵat 18:00-ge josparlanǵan. Ekinshi reıstiń jolaýshylary 30 tamyz kúni Medınadan Almatyǵa jetkiziledi.
Aıta keteıik, bıyl Saýd Arabıasyna qajylyqqa 3000 qazaqstandyq attanady. Qazaqstandyq qajylardy 18 kompanıa aparady. О́tinish bergenderdiń qataryna 16-89 jas aralyǵyndaǵy azamattar bar. Kámeletke tolmaǵandar ata-analarymen birge barady.
Bıylǵy qajylyq saparynyń quny 4400-5000 AQSH dollardy quraıdy. Qajylyq saparynyń quny kórsetiletin servıske, tamaqqa, qonaqúıdiń alystyǵy men jaqyndyǵyna baılanysty bolady.