Nursultan Nazarbaev «Astana Hub» jumysyn resmı iske qosty
Astana Hub-ty iske qosý sharasyna QR Úkimet basshysy Baqytjan Saǵyntaev, Estonıa Premer-Mınıstri Iýrı Raktas, halyqaralyq IT-qoǵamdastyǵynyń negizgi ókilderi, tehnologıa salasynda tanylǵan sarapshylar, kásiporyn basshylary, tehnologıalyq kásipkerler, sondaı-aq birqatar eldiń memlekettik sektorlarynyń ókilderi, ǵalymdar, tsıfrlyq ázirlemeler salasynyń mamandary, venchýrlyq ınvestorlar qatysty.
«Búgin biz Astana Hub-ty ashyp otyrmyz. Bul Qazaqstannyń tsıfrlyq álemi úshin ǵana emes tolyqtaı alǵanda mańyzdy oqıǵa sanalady. Barlyqtaryńyzdy ınnovatsıany damytýǵa belsendi qatysýǵa shaqyramyn jáne Astana Hub kompanıalar úshin álemdik tanymaldyqqa ıe bolý jolyndaǵy tramplınge aınalaryna senimdimin. Biz kúsh biriktirý arqyly barlyq alǵa qoıylǵan maqsattarǵa jedel ári tıimdi qol jetkize alatyndyǵymyzǵa senimim mol. Al maqsat belgili - qazaqstandyqtar búkil álemnen artta qalyp qoımaýy kerek», - dedi Nursultan Nazarbaev.
Elbasy búginde Qazaqstan postkeńestik elderi ishinde reformalar qarqyny, jan basyna shaqqandaǵy ekonomıka kólemi men damýy boıynsha aldyńǵy qatarly memleketke aınalǵanyn basa aıtty.
Aıta keteıik, Astana Hub mıssıasy - el ekonomıkasyn nyǵaıtý úshin startap-mádenıetti damytý jáne joǵary tehnologıalyq jobalardy qoldaý. Aldaǵy ýaqytta tehnopark Qazaqstan ınnovatsıasynyń ekojúıesin damytýdyń ózegi ári lokomotıvine aınalyp, tehnologıalyq bıznesti damytý úshin halyqaralyq deńgeıde moıyndalǵan hab bolýy qajet. Jalpy, Astana Hub 2022 jylǵa qaraı startap-rezıdentterdi ınvestıtsıalaý kórsetkishin 67 mlrd teńgege jetkizýdi maqsat etip otyr.